ఓరీ మూర్ఖుడా.. సర్వనాశనం చేశావు కదరా!

లక్నో సూపర్ జెయింట్స్ వరుస పరాజయాలతో సతమతమవుతుండగా.. కోల్‌కతా నైట్ రైడర్స్ జట్టుతో జరిగిన సూపర్ ఓవర్ మ్యాచ్‌లో కెప్టెన్ రిషబ్ పంత్ తీసుకున్న నిర్ణయాలపై తీవ్ర విమర్శలు వ్యక్తమవుతున్నాయి. ముఖ్యంగా నికోలస్ పూరన్‌ను సూపర్ ఓవర్లో బ్యాటింగ్‌కు పంపడంపై దక్షిణాఫ్రికా దిగ్గజ బౌలర్ డేల్ స్టెయిన్ సోషల్ మీడియా వేదికగా తీవ్రంగా మండిపడ్డారు. నికోలస్ పూరన్ ఫామ్‌లో లేడనే విషయం స్పష్టంగా కనిపిస్తున్నా.. రిషబ్ పంత్ అతనిపై ఎందుకు మొగ్గు చూపారో అర్థం కావడం లేదని డేల్ స్టెయిన్ ఆగ్రహం వ్యక్తం చేశాడు.

సూపర్ ఓవర్లో సున్నా పూరన్!
ఐపీఎల్ చరిత్రలో నికోలస్ పూరన్ సూపర్ ఓవర్ రికార్డు అత్యంత దారుణంగా ఉంది. నికోలస్ పూరన్ ఇప్పటివరకు ఐపీఎల్‌లో మూడు సూపర్ ఓవర్లు ఆడగా.. ఆ మూడింటిలోనూ కనీసం ఒక్క పరుగు కూడా చేయకుండా డకౌట్ అయ్యాడు. కేవలం ఐపీఎల్‌లోనే కాకుండా అతని మొత్తం టీ20 కెరీర్లో 5 సూపర్ ఓవర్లు ఆడగా.. 4 సార్లు సున్నాకే వెనుదిరగడం గమనార్హం. కేకేఆర్ స్పిన్నర్ సునీల్ నరైన్ వేసిన సూపర్ ఓవర్లో కూడా నికోలస్ పూరన్ తన చెత్త రికార్డును కొనసాగిస్తూ మొదటి బంతికే ఔటయ్యాడు.

రిషబ్ పంత్ నిర్ణయంపై డేల్ స్టెయిన్ ఫైర్
రిషభ్ పంత్ నిర్ణయాలను తప్పుబడుతూ డేల్ స్టెయిన్ షాకింగ్ కామెంట్స్ చేశాడు. "ఐపీఎల్‌లో మూడు సూపర్ ఓవర్లు ఆడిన నికోలస్ పూరన్.. మూడు సార్లూ జీరోకే ఔటయ్యాడు. అలాంటి ప్లేయర్‌ను మళ్లీ పంపడం కంటే పెద్ద నేరం మరొకటి ఉండదు. లక్నో జట్టులో మిచెల్ మార్ష్, స్వయంగా రిషభ్ పంత్ లేదా ముకుల్ చౌదరి వంటి ప్రత్యామ్నాయాలు ఉన్నప్పుడు నికోలస్ పూరన్‌ను ఎందుకు ఎంచుకున్నారు?" అని డేల్ స్టెయిన్ ప్రశ్నించాడు. ఈ సీజన్‌లో నికోలస్ పూరన్ సగటు కేవలం 10.25 మాత్రమే ఉండటం కూడా అతని ఫామ్ లేమిని స్పష్టం చేస్తోంది.

ఫామ్ లేని ప్లేయర్‌పై నమ్మకం ఎందుకు?
సాధారణంగా సూపర్ ఓవర్ వంటి నిర్ణయాత్మక సమయాల్లో ఫామ్‌లో ఉన్న ప్లేయర్లను క్రీజులోకి పంపాలని.. కానీ రిషబ్ పంత్ దీనికి విరుద్ధంగా వ్యవహరించాడని డేల్ స్టెయిన్ అభిప్రాయపడ్డాడు. "పూరన్‌కు ప్రస్తుతం తన మీద తనకే నమ్మకం ఉన్నట్లు లేదు. అతను ఈ సీజన్‌లో కనీసం 30 లేదా 40 పరుగులు కూడా సరిగ్గా చేయలేదు. జట్టుకు విజయం ఎంతో అవసరమైన తరుణంలో, ఆత్మవిశ్వాసం లేని ఆటగాడిని పంపి పంత్ భారీ మూల్యం చెల్లించుకున్నాడు" అని స్టెయిన్ విశ్లేషించాడు.

లక్నో పరిస్థితి అగమ్యగోచరం
కేకేఆర్ చేతిలో ఓటమి పాలవ్వడంతో లక్నో సూపర్ జెయింట్స్ పాయింట్ల పట్టికలో ఆఖరి స్థానానికి పడిపోయింది. ఈ సీజన్‌లో ఆడిన ఎనిమిది మ్యాచ్‌ల్లో 6 పరాజయాలతో రిషబ్ పంత్ సేన డీలా పడింది. వ్యూహాత్మక తప్పిదాలు, సీనియర్ ఆటగాళ్ల వైఫల్యం జట్టును పీకల్లోతు కష్టాల్లోకి నెట్టాయి. రాబోయే మ్యాచ్‌ల్లోనైనా పంత్ తన వ్యూహాలను మార్చుకోకపోతే లక్నో ప్లేఆఫ్స్ రేసు నుంచి తప్పుకోవడం ఖాయంగా కనిపిస్తోంది.