వన్డేల్లో రోహిత్ శర్మ 24వ సెంచరీ: పాక్ విజయ లక్ష్యం 337

హాఫ్ సెంచరీలు:

'హిట్ మ్యాన్' రోహిత్ శర్మ సిక్సులు, ఫోర్లతో చెలరేగాడు. పాక్ బౌలర్ షాదాబ్ ఖాన్ వేసిన 12వ ఓవర్ చివరి రెండు బంతులను సిక్స్, ఫోర్ బాది హాఫ్ సెంచరీ చేసాడు. కేవలం 35 బంతుల్లో 6 ఫోర్లు, రెండు సిక్సర్లతో హాఫ్ సెంచరీ అందుకున్నాడు. అయితే హాఫ్ సెంచరీ అనంతరం కొంచెం దూకుడు తగ్గించాడు. కేవలం సింగిల్స్ తీస్తూ స్కోరు బోర్డును ముందుకు నడిపాడు. మొదటగా ఆచితూచి ఆడిన రాహుల్.. అనంతరం గేర్ మార్చి పాక్ బౌలర్లపై విరుచుకుపడ్డాడు. ఈ క్రమంలోనే మాలిక్‌ వేసిన 21.4 బంతిని సిక్స్‌ కొట్టి హాఫ్‌ సెంచరీ అందుకున్నాడు.

రోహిత్ సెంచరీ:

ఇక వాహబ్‌ వేసిన 23.5 బంతిని రాహుల్ (57; 78బంతుల్లో 3×4, 2×6) షాట్‌ ఆడి బాబర్‌ అజామ్‌ చేతికి చిక్కాడు. దీంతో 136 పరుగుల తొలి వికెట్ కు తెరపడింది. ఈ సమయంలో క్రీజులోకి వచ్చిన కెప్టెన్ కోహ్లీ.. రోహిత్‌కు మంచి సహకారం అందించాడు. బౌండరీలు బాదుతూ రోహిత్ ఈ ప్రపంచకప్‌లో రెండో సెంచరీ నమోదు చేశాడు. అయితే 140 పరుగుల వ్యక్తిగత స్కోరు వద్ద హసన్ అలీ బౌలింగ్‌లో రియాజ్‌కు క్యాచ్ ఇచ్చి ఔట్ అయ్యాడు. 113 బంతులు ఎదుర్కొన్న రోహిత్ 14 ఫోర్లు, 3 సిక్సర్లతో 140 పరుగులు చేశాడు.

బ్యాట్‌ ఝళిపించిన పాండ్యా:

అనంతరం క్రీజులోకి వచ్చిన పాండ్యా బ్యాట్‌ ఝళిపింఛాడు. 19 బంతుల్లో 2 ఫోర్లు, సిక్సర్‌తో 26 పరుగులు చేశాడు. అయితే ధోనీ ఒక్క పరుగుకే ఔట్ అయి నిరాశపరిచాడు. ఈ సమయంలో (46.4 ఓవర్లలో 305/4 వద్ద) వర్షం ప్రారంభం కావడంతో మ్యాచ్‌ను తాత్కాలికంగా నిలిచిపోయింది. వెంటనే తగ్గిపోవడంతో.. తిరిగి ప్రారంభమయ్యాక కోహ్లీ (77) అవుటయ్యాడు. చివర్లో విజయ్ శంకర్ 15, కేదార్ జాదవ్‌ 9 పరుగులు చేయడంతో భారత్ 336 పరుగులు చేసింది. పాకిస్థాన్ బౌలర్లలో మహ్మద్ ఆమిర్ 3 వికెట్లు తీసాడు.