కివీస్‌పై ఘన విజయం.. సెమీస్‌కు ఇంగ్లండ్‌

ఆదిలోనే ఎదురుదెబ్బ:

భారీ ఛేదనలో కివీస్‌కు మంచి ఆరంభం లభించలేదు. ఓపెనర్ నికోల్స్ (0) రూపంలో ఎదురుదెబ్బ తగిలింది. మార్క్ వుడ్ బౌలింగ్‌లో నికోల్స్ వికెట్ల ముందు దొరికిపోయాడు. మరో ఓపెనర్ గప్టిల్( 8) కూడా నిరాశపరిచాడు. దీంతో ఆదిలోనే రెండు కీలక వికెట్లు కోల్పోయి పీకల్లోతు కష్టాల్లో పడింది. అనంతరం సీనియర్‌ ఆటగాళ్లు విలియమ్సన్‌, రాస్‌ టేలర్‌లు ఇన్నింగ్స్‌ను చక్కదిద్దే ప్రయత్నం చేశారు.

8 పరుగుల వ్యవధిలో రెండు రనౌట్‌లు:

అయితే దురదృష్టవశాత్తు విలియమ్సన్‌ (27), టేలర్‌ (28)లు ఎనిమిది పరుగుల తేడాతో రనౌట్‌ కావడం కివీస్‌ను కోలుకోకుండా చేసింది. మూడో వికెట్‌కు వీరిద్దరూ 47 పరుగులు జోడించారు. అనంతరం ఏ దశలోనూ కివీస్‌ విజయంవైపు పయనించలేదు. మిడిల్ ఆర్డర్ బ్యాట్స్‌మన్‌ లాథమ్‌ (57; 65 బంతుల్లో 5 ఫోర్లు) మినహా ఎవరూ అంతగా ఆకట్టుకోలేకపోయారు.

వరుస విరామాల్లో వికెట్లు:

జిమ్మీ నీషమ్‌ (9), గ్రాండ్‌హోమ్‌ (3)లు పూర్తిగా నిరాశపరిచారు. ఇంగ్లండ్ కట్టుదిట్టమైన బౌలింగ్‌తో కివీస్ వరుస విరామాల్లో వికెట్లు కోల్పోయింది. వచ్చిన బ్యాట్స్‌మెన్ వచ్చినట్లు పెవిలియన్ చేరడంతో కివీస్‌ కనీసం 200 పరుగులు కూడా దాటలేకపోయంది. దీంతో భారీ ఓటమి చవిచూసింది. ఇంగ్లండ్‌ బౌలర్లలో మార్క్‌ వుడ్‌ మూడు వికెట్లు తీయగా.. వోక్స్‌, రషీద్‌, స్టోక్స్‌, ఫ్లంకెట్‌, ఆర్చర్‌లు తలో వికెట్‌ పడగొట్టారు. సెంచరీ చేసిన బెయిర్‌ స్టోకు 'ప్లేయర్‌ ఆఫ్‌ ద మ్యాచ్‌' అవార్డు లభించింది.