మహేంద్ర సింగ్ ధోనీ కంటే.. జోస్ బట్లర్ బెస్ట్

ధోనీ మళ్లీ ఫామ్‌లోకి వచ్చాడని

ఈ క్రమంలో ధోనీ మళ్లీ ఫామ్‌లోకి వచ్చాడని కొందరంటుంటే, అతను ఎప్పుడూ ఒకేలా ఆడుతున్నాడంటూ ప్రశంసలు కురిపించారు. అలాంటిది.. వన్డే, టీ20ల్లో ధోనీ కంటే ఇంగ్లాండ్ వికెట్ కీపర్/ బ్యాట్స్‌మెన్ జోస్ బట్లర్ అత్యుత్తమంగా ఆడుతున్నాడని ఆస్ట్రేలియా కెప్టెన్ టిమ్ పైనీ అభిప్రాయపడ్డాడు. తాజాగా ఆస్ట్రేలియాతో ముగిసిన ఐదో వన్డేలో అజేయంగా సెంచరీ బాదేసిన జోస్ బట్లర్ 122 బంతుల్లో (110) 12 ఫోర్లు, 1 సిక్సుతో నాటౌట్‌గా నిలిచి ఒంటిచేత్తో ఇంగ్లాండ్‌ని గెలిపించాడు.

ఒంటిచేత్తో ఇంగ్లాండ్‌ని గెలిపించాడు

206 పరుగుల లక్ష్య ఛేదనలో ఇంగ్లాండ్ 29.4 ఓవర్లు ముగిసే సమయానికి 114/8తో ఓటమి అంచుల్లో నిలిచింది. కానీ.. ఈ దశలో అసాధారణ ఇన్నింగ్స్ ఆడిన బట్లర్.. ఆదిల్ రషీద్ (20: 47 బంతుల్లో)తో కలిసి 8వ వికెట్‌కి 81 పరుగుల భాగస్వామ్యంతో ఇంగ్లాండ్‌కి ఓటమి తప్పించాడు. దీంతో.. ఐదు వన్డేల సిరీస్‌ని ఇంగ్లాండ్ 5-0తో క్వీన్‌స్వీప్ చేయగలిగింది.

టిమ్‌ పైనీ మాట్లాడుతూ.. జోస్ బట్లర్ చాలా బాగా

మ్యాచ్ అనంతరం బట్లర్ ఇన్నింగ్స్‌పై టిమ్‌ పైనీ మాట్లాడుతూ ‘జోస్ బట్లర్ చాలా బాగా ఆడాడు. వన్డే, టీ20ల్లో ఇప్పుడు అతనే అత్యుత్తమ వికెట్ కీపర్/ బ్యాట్స్‌మెన్. ప్రస్తుతం అతనికి దరిదాపుల్లోకి కూడా ఎవరూ రాలేరేమో అనిపిస్తోంది. మహేంద్రసింగ్‌ ధోనీ కూడా మంచి వికెట్ కీపర్/ బ్యాట్స్‌మెన్. కానీ.. గత కొద్దిరోజుల నుంచి జోస్ బట్లర్ అతని కంటే అత్యుత్తమంగా ఆడుతున్నాడు.'

మ్యాచ్ గమనానికి అనుగుణంగా

వన్డే‌ల్లో మ్యాచ్ గమనానికి అనుగుణంగా ఆడటమెలాగో బట్లర్ చక్కగా అర్థం చేసుకుంటున్నాడు' అని ప్రశంసించాడు. ఈ వన్డే సిరీస్‌లో మొత్తం 275 పరుగులు చేసిన బట్లర్.. మూడు మ్యాచ్‌ల్లో 91, 54, 110 పరుగులతో నాటౌట్‌గా నిలిచాడు. ఈ సిరీస్‌ కంటే ముందు జరిగిన ఐపీఎల్ 2018 సీజన్‌లో రాజస్థాన్ రాయల్స్‌ తరఫున ఆడిన బట్లర్.. దాదాపు 600 పరుగులతో రాణించాడు.