రాజకీయాల్లోకి క్రికెటర్.. బీజేపీలో చేరిన సీఎస్కే మాజీ ఆటగాడు

Kedar Jadhav: మహారాష్ట్ర క్రికెటర్ కేదార్ జాదవ్ ఏప్రిల్ 8న బీజేపీలో చేరడం ద్వారా రాజకీయాల్లోకి అడుగుపెట్టారు. కేదార్ జాదవ్ రాజకీయాల్లో తన ఇన్నింగ్స్‌ను ప్రారంభించారు. మంగళవారం ముంబై బీజేపీ కార్యాలయంలో పార్టీ అధ్యక్షుడు చంద్రశేఖర్ బవాంకులే సమక్షంలో పార్టీ సభ్యత్వం తీసుకున్నారు. ఆల్‌రౌండర్‌గా క్రికెట్ లో రాణించిన కేదార్ జాదవ్ కంటే ముందే చాలా మంది క్రికెటర్లు రాజకీయాల్లోకి ప్రవేశించారు. పంజాబ్ నుంచి నవజ్యోత్ సింగ్ సిద్ధూ, బెంగాల్ నుంచి యూసుఫ్ పఠాన్, బెంగాల్ క్రీడా మంత్రి మనోజ్ తివారీ వరకు అందరూ రాజకీయాల్లో బాగా రాణిస్తున్నారు. టీమిండియా మాజీ ఓపెనర్, ప్రస్తుత ప్రధాన కోచ్ గౌతమ్ గంభీర్ కూడా బీజేపీలో చేరారు. అయితే ఢిల్లీ నుంచి ఎన్నికల్లో గెలిచిన తర్వాత గంభీర్ కోచింగ్ కెరీర్ కోసం రాజకీయాలను విడిచిపెట్టారు.

మహారాష్ట్రలోని పుణెలో జన్మించిన కేదార్ జాదవ్ జూన్,2024లో క్రికెట్ నుంచి రిటైర్ అయ్యాడు. కేదార్ జాదవ్ భారత మాజీ కెప్టెన్ మహేంద్ర సింగ్ ధోనితో సన్నిహితంగా ఉన్నాడు. ధోని కెప్టెన్ గా ఉన్న సమయంలో కేదార్ జాదవ్ బ్యాటింగ్, బంతితో భారత్ తరఫున అనేక మ్యాచ్ లను గెలిపించాడు. కేదార్ జాదవ్ నవంబర్ 2014లో రాంచీలో శ్రీలంకతో జరిగిన వన్డే మ్యాచ్ ద్వారా అరంగేట్రం చేశాడు. కేదార్ జాదవ్ 73 వన్డేలు ఆడి 42.09 సగటుతో 1389 పరుగులు చేశాడు. కేదార్ జాదవ్ పార్ట్ టైమ్ బౌలింగ్ కూడా చేశాడు. 5.15 ఎకానమీతో 27 వికెట్లు పడగొట్టాడు.

కేదార్ జాదవ్ ఐపీఎల్ కెరీర్
40 ఏళ్ల కేదార్ జాదవ్ ఇండియన్ ప్రీమియర్ లీగ్(ఐపీఎల్)లో కూడా ఆడాడు. కేదార్ జాదవ్ చెన్నై సూపర్ కింగ్స్, రాయల్ ఛాలెంజర్స్ బెంగళూరు, సన్‌రైజర్స్ హైదరాబాద్, ఢిల్లీ క్యాపిటల్స్ వంటి జట్లకు ప్రాతినిధ్యం వహించాడు.కేదార్ జాదవ్ ఐపీఎల్ కెరీర్ 2009 నుంచి 2023 వరకు కొనసాగింది. కేదార్ జాదవ్ 2010లో కొచ్చి టస్కర్స్ కేరళ తరపున కూడా ఆడాడు. ఆ జట్టు ఇప్పుడు లేదు.

గుర్తుండిపోయే ఇన్నింగ్స్
పుణెలో ఇంగ్లాండ్ తో జరిగిన వన్డేలో కేదార్ జాదవ్ తన ఇన్నింగ్స్ తో గుర్తుండిపోతాడు. 2017లో జరిగిన తొలి వన్డేలో ఇంగ్లాండ్ జట్టు భారత్ ముందు 351 పరుగుల లక్ష్యాన్ని నిర్దేశించింది. భారత్ మంచి ఆరంభాన్ని పొందలేదు. జట్టులో సగం మంది 63 పరుగులకే ఔట్ అయ్యారు. ఆ తర్వాత కేదార్ జాదవ్ ఆ బాధ్యతను స్వీకరించి 76 బంతుల్లో 120 పరుగులు చేశాడు. కేదార్ జాదవ్ విరాట్ కోహ్లీ(122)తో కలిసి 200 పరుగుల భాగస్వామ్యాన్ని పంచుకున్నాడు. ఇంకా 11 బంతులు మిగిలి ఉండగానే భారత్ మ్యాచ్ గెలిచేందుకు సాయం చేశాడు.