కుమార సంగక్కర ఇంట్లో తీవ్ర విషాదం!

శ్రీలంక క్రికెట్ దిగ్గజం, రాజస్థాన్ రాయల్స్ హెడ్ కోచ్ కుమార సంగక్కర కుటుంబంలో తీవ్ర విషాదం చోటుచేసుకుంది. ఆయన తండ్రి, ప్రముఖ న్యాయవాది క్షేమ సంగక్కర తుదిశ్వాస విడిచారు. ఈ వార్త తెలియగానే క్రికెట్ లోకం దిగ్భ్రాంతికి గురైంది. క్రీడాకారులు, అభిమానులు సోషల్ మీడియా వేదికగా సంతాపం ప్రకటిస్తున్నారు.

సంగక్కర తొలి గురువు ఆయనే!
కుమార్ సంగక్కరను ప్రపంచ స్థాయి క్రికెటర్‌గా తీర్చిదిద్దడంలో ఆయన తండ్రి క్షేమ సంగక్కర పాత్ర ఎంతో కీలకం. వృత్తిరీత్యా ఆయన క్యాండీ నగరంలో న్యాయవాది అయినప్పటికీ.. క్రీడల పట్ల ఆయనకు అమితమైన ఆసక్తి ఉండేది. సంగక్కరకు క్రికెట్‌లో ఓనమాలు నేర్పిన తొలి కోచ్ ఆయనే. కుమారుడిలో క్రమశిక్షణను పెంచుతూ, ప్రతిరోజూ గంటల తరబడి శిక్షణ ఇచ్చేవారని కుటుంబ సభ్యులు గుర్తు చేసుకున్నారు.

కుటుంబ సభ్యుల ప్రకటన
సంగక్కర కుటుంబం ఈ బాధాకరమైన వార్తను ధ్రువీకరిస్తూ ఓప్రకటన విడుదల చేసింది. "ప్రముఖ న్యాయవాది క్షేమ సంగక్కర ఇక లేరని తెలపడానికి మేము ఎంతో విచారిస్తున్నాం. ఆయన కుమారి భర్త, అలాగే తుషారి, వెమింద్రా, సారంగ, కుమార సంగక్కరలకు తండ్రి. కుటుంబ సభ్యులు, స్నేహితులు, సహచరులు ఆయనను ఎప్పటికీ గుర్తుంచుకుంటారు" అని పేర్కొన్నారు. మార్చి 4న ఆయన అంత్యక్రియలు నిర్వహించనున్నట్లు తెలిపారు.

తండ్రి గురించి సంగక్కర ఏమన్నారంటే?
కుమార్ సంగక్కర తన రిటైర్మెంట్ సమయంలో ఇచ్చిన భావోద్వేగ ప్రసంగంలో తన తండ్రి గురించి ప్రత్యేకంగా ప్రస్తావించారు. "నేను సాధించిన ప్రతి విజయానికి నా తండ్రి పడిన శ్రమ, ఆయన ఇచ్చిన ప్రోత్సాహమే కారణం" అని కృతజ్ఞతలు తెలిపారు. ప్రస్తుతం సంగక్కర ఐపీఎల్ జట్టు రాజస్థాన్ రాయల్స్‌కు హెడ్ కోచ్‌గా, డైరెక్టర్‌గా బాధ్యతలు నిర్వర్తిస్తున్నారు.

క్రీడా ప్రపంచం సంతాపం
క్షేమ సంగక్కర మృతి పట్ల శ్రీలంక క్రికెట్ బోర్డుతో పాటు పలువురు అంతర్జాతీయ క్రికెటర్లు విచారం వ్యక్తం చేశారు. చట్టం, క్రికెట్ రంగాలలో ఆయన చేసిన కృషి చిరస్మరణీయమని అభిమానులు కొనియాడుతున్నారు. ఆయన ఆత్మకు శాంతి చేకూరాలని సోషల్ మీడియాలో పోస్టులు వెల్లువెత్తుతున్నాయి.