చెన్నై సూపర్ కింగ్స్ జోరుకు తలవంచిన రాజస్థాన్ రాయల్స్

చెన్నై: చెపాక్‌ స్టేడియంలో బుధవారం జరిగిన మ్యాచ్‌లో చెన్నై సూపర్‌కింగ్స్‌ 8 వికెట్ల తేడాతో రాజస్థాన్‌ను చిత్తు చేసింది. రాహుల్‌ ద్రవిడ్‌ (66; 51 బంతుల్లో 10X4), షేన్‌ వాట్సన్‌ (32; 26 బంతుల్లో 5X4)ల చక్కటి ఆరంభం (86)తో భారీ స్కోరు చేసేలా కనిపించిన రాజస్థాన్‌ను 147 పరుగులకే కట్టడి చేసిన చెన్నై తర్వాత లక్ష్యాన్ని 2 వికెట్లు కోల్పోయి అలవోకగా ఛేదించింది. 'మ్యాన్‌ ఆఫ్‌ ద మ్యాచ్‌' మైకేల్‌ హసి (79 నాటౌట్‌; 55 బంతుల్లో 8X4, 1X6), సురేశ్‌ రైనా (61; 51 బంతుల్లో 3X4, 1X6) చెన్నైకి సునాయాస విజయాన్నందించారు.

లక్ష్యఛేదనలో చెన్నైకి శుభారంభం లభించలేదు.విజయ్‌ (5) రెండో ఓవర్లోనే పెవిలియన్‌ చేరాడు. దీంతో నిలదొక్కుకునే వరకు నెమ్మదిగా ఆడారు హసి, రైనా. 10 ఓవర్లకు చెన్నై 73/1తో ఉన్నపుడు రాజస్థాన్‌ పోటీలోనే ఉన్నట్లనిపించింది. ఐతే నయన్‌ దోషి వేసిన 11వ ఓవర్లో 19 పరుగులు రాబట్టిన హసి, రైనా రాయల్స్‌ ఆశలకు గండికొట్టారు. రెండో వికెట్‌కు వీరిద్దరూ 137 పరుగులు జోడించి, చెన్నైని గెలిపించారు.

అంతకుముందు ఓపెనర్లు రాహుల్‌ ద్రవిడ్‌, షేన్‌ వాట్సన్‌లు టోర్నీలోనే రాజస్థాన్‌కు అత్యుత్తమ భాగస్వామ్యం (86) అందించినా.. మిగతా బ్యాట్స్‌మెన్‌ విఫలమయ్యారు. పవర్‌ ప్లే (6 ఓవర్లు) ముగిసేసరికి రాజస్థాన్‌ స్కోరు 47/0. తర్వాత ద్రవిడ్‌ జోరు మొదలైంది. స్పిన్నర్లను లక్ష్యంగా చేసుకుని ద్రవిడ్‌ రెచ్చిపోయాడు. అతను కొట్టిన 10 బౌండరీల్లో ఎనిమిది స్పిన్నర్ల బౌలింగ్‌లో వచ్చినవే. పది ఓవర్ల తర్వాత పరిస్థితి మారిపోయింది. జకాతి (2/22) 11వ ఓవర్లో వాట్సన్‌ను చక్కటి రిటర్న్‌ క్యాచ్‌తో పెవిలియన్‌ చేర్చి, వికెట్ల పతనానికి తెరతీశాడు. ఆ తర్వాత మెనారియా (2), బోథా (8), ద్రవిడ్‌లు పేలవ షాట్లు ఆడి పెవిలియన్‌ చేరారు. 6 ఓవర్ల వ్యవధిలో 4 వికెట్లు పడటంతో స్కోరు వేగం పడిపోయింది. ఇదే అదనుగా చెన్నై బౌలర్లు మరింత కట్టుదిట్టంగా బౌలింగ్‌ చేశారు.