అభిమానులు అనాసక్తి: ఛాంపియన్స్ ట్రోఫీని 'వర్షం' మింగేస్తుందా?

హైదరాబాద్: ఇంగ్లాండ్ వేదికగా ప్రస్తుతం జరుగుతున్న ఛాంపియన్స్ ట్రోఫీని వర్షం మింగేస్తుందా? అంటే అవుననే అంటున్నారు రాజకీయ విశ్లేషకులు. టీ20లు వచ్చిన తర్వాత వన్డేలకు క్రమంగా ఆదరణ తగ్గిపోతున్న సంగతి తెలిసిందే. ఛాంపియన్స్ ట్రోఫీ లాంటి టోర్నీల్లో వర్షం కారణంగా మ్యాచ్‌లను వీక్షించేందుకు క్రికెట్ అభిమానులు అనాసక్తిని ప్రదర్శిస్తున్నారు.

ఛాంపియన్స్ ట్రోఫీ స్పెషల్ | ఫోటోలు | స్కోరు కార్డు

ఇంగ్లాండ్ వేదికగా ఇప్పటివరకు ఆరు మ్యాచ్‌లు జరగ్గా అందులో రెండు మ్యాచ్‌లు వర్షం కారణంగా రద్దు అయ్యాయి. అంతేకాదు టోర్నీలోనే హై ఓల్టేజ్ మ్యాచ్‌గా నిలిచిన భారత్-పాక్ మ్యాచ్‌లో కూడా వర్షం అడ్డంకిగా మారాడు. అయితే మధ్యతో వర్షం తెరపి ఇవ్వడంతో మ్యాచ్‌ను యధావిధిగా కొనసాగించారు.

తాజాగా మంగళవారం జరిగిన ఇంగ్లాండ్‌-న్యూజిలాండ్‌ మ్యాచ్‌కూ వర్షం అంతరాయం కలిగించింది. వర్షం కారణంగా మ్యాచ్ సమీకరణాలే మారిపోయాయి. కాగా, ఈ టోర్నీలో వర్షం వల్ల బాగా నష్టపోయిన జట్టు ఏదైనా ఉందంటే అది ఆస్ట్రేలియానే అని చెప్పాలి. ఆ జట్టు ఆడిన రెండు మ్యాచ్‌లూ వర్షం కారణంగా రద్దయ్యాయి.

బంగ్లాదేశ్‌పై గెలిచే అవకాశం ఉన్నప్పటికీ వర్షం కారణంగా ఇరు జట్లకు చెరో పాయింట్ లభించింది. డక్‌వర్త్‌-లూయిస్‌ పద్ధతి ప్రకారం విజయానికి అవసరమైన పరుగులు చేసినా.. ఆ పద్ధతిలో ఫలితం ప్రకటించడానికి రెండో ఇన్నింగ్స్‌లో కనీసం 20 ఓవర్లు పూర్తయి ఉండాలన్న నిబంధన ఆస్ట్రేలియాకు విజయాన్ని దూరం చేసింది.

ఆసీస్-బంగ్లా మ్యాచ్‌కి వర్షం అంతరాయం

ఆస్ట్రేలియా విజయానికి ఇంకా నాలుగు ఓవర్లు అవసరమయ్యాయి. అయినా సరే వర్షం తగ్గకపోవడంతో ఇరు జట్లకు చెరో పాయింట్ కేటాయించారు. ఇక టోర్నీలో భాగంగా ఆస్ట్రేలియా-న్యూజిలాండ్ జట్ల మధ్య జరిగిన తొలి మ్యాచ్‌లో

న్యూజిలాండ్ గెలిచే స్థితిలో ఉండగా వర్షం అడ్డంకిగా మారి ఆ జట్టుకు నిరాశ మిగిల్చాడు.

సర్వత్రా విమర్శలు

ఇలా వర్షం కారణంగా ఛాంపియన్స్ టోర్నీపైనే అభిమానుల ఆసక్తి సన్నగిల్లిపోయే పరిస్థితి ఏర్పడింది. అంతేకాకదు ఇంగ్లాండ్‌లో వర్షాలు పడే సమయంలో ఈ టోర్నీని షెడ్యూల్‌ చేయడంపై సర్వత్రా విమర్శలు వ్యక్తమవుతున్నాయి. ఛాంపియన్స్ ట్రోఫీ షెడ్యూల్ ప్రకారం జూన్ 1 నుంచి 18 వరకు జరగనుంది.

ఛాంపియన్స్‌ ట్రోఫీ చరిత్రలో కలిసిపోవడం ఖాయం

టోర్నీలో రాబోయే రోజుల్లో కూడా వర్షం ప్రభావం ఇలాగే కొనసాగితే.. ఛాంపియన్స్‌ ట్రోఫీ చరిత్రలో కలిసిపోవడం ఖాయమని క్రికెట్ విశ్లేషకులు అంటున్నారు. అయితే ఛాంపియన్స్‌ ట్రోఫీకి వరుణుడు అంతరాయం కలిగించడం ఇదే తొలిసారి కాదు. 2002లో శ్రీలంక వేదికగా జరిగిన టోర్నీలో కూడా వర్షం దెబ్బ తీసింది.

గతంలో కూడా ఇలా

అప్పుడు కూడా ఫైనల్ మ్యాచ్ రెండుసార్లు రద్దు అయింది. రిజర్వ్‌ డే నాడూ వర్షం పడటంతో మ్యాచ్‌ జరగలేదు. దీంతో ఆనాడు ఫైనల్‌లో తలపడిన భారత్‌, శ్రీలంక జట్లను సంయుక్త విజేతలుగా నిలిచాయి. ఇక 2013లో జరిగిన ఛాంపియన్స్ ట్రోఫీలో కూడా వరుణుడు ఇలాగే ఇబ్బంది పెట్టాడు.

ఛాంపియన్స్ ట్రోఫీకి వర్షం పెను ప్రభావం

ఇంగ్లాండ్, టీమిండియా జట్లు ఫైనల్‌కు చేరుకున్నాయి. పైనల్ మ్యాచ్‌కి వర్షం అడ్డంకిగా మారడంతో పైనల్ మ్యాచ్‌ని టీ20 ఓవర్లకు కుదించారు. ఈ పైనల్‌లో ఇంగ్లాండ్‌పై టీమిండియా విజయం సాధించి ఛాంపియన్స్ ట్రోఫీ విజేతగా నిలిచింది. తాజాగా జరుగుతున్న ఛాంపియన్స్ ట్రోఫీకి వర్షం దెబ్బ తీవ్రంగా ప్రభావం చూపిస్తోంది.