విరాట్ కోహ్లీకి ప్రత్యేకమైన స్టేడియానికి బాంబు బెదిరింపులు!

Bomb Threat: భారత్, పాకిస్థాన్ మధ్య ఉద్రిక్తతల మధ్య విరాట్ కోహ్లీతో ప్రత్యేక సంబంధం ఉన్న స్టేడియాన్ని పేల్చివేస్తామని బెదిరింపులు వచ్చినట్లు తెలిసింది. సరిహద్దుకు సమీపంలో ఉన్న భారత గ్రామాలు, నగరాలను పాకిస్థాన్ నిరంతరం లక్ష్యంగా చేసుకుంటోంది. పాకిస్థాన్ చేసే ప్రతి దాడిని భారత సైన్యం భగ్నం చేస్తున్నప్పటికీ పాకిస్తాన్ తన దుష్ట కార్యకలాపాలను మానుకోవడం లేదు. ఈ క్రమంలోనే భారత క్రికెట్ స్టేడియంపై బాంబు దాడి చేస్తామని పాకిస్థాన్ నుంచి ఒక మెయిల్ వచ్చింది.

ఇండోర్ స్టేడియానికి బాంబు బెదిరింపులు
పాకిస్థాన్ ఇప్పుడు తన దుర్మార్గపు కార్యకలాపాలకు పాల్పడుతోంది. ఇండోర్‌లోని హోల్కర్ స్టేడియంపై బాంబు దాడి చేస్తామని పాకిస్థాన్ నుంచి ఈమెయిల్ ద్వారా బెదిరింపులు వచ్చాయి. ఇది కాకుండా ఆస్పత్రిని పేల్చేస్తామని కూడా బెదిరింపులు వచ్చాయి. ఈ మెయిల్ మధ్యప్రదేశ్ క్రికెట్ అసోసియేషన్‌(MPCA)కు వచ్చింది. ఆ తర్వాత ఎంపీసీఏ కార్యదర్శి దీని గురించి పోలీసులకు సమాచారం ఇచ్చారు. మెయిల్ ప్రకారం.. పాకిస్థాన్‌తో గొడవ పడొద్దని మెయిల్‌లో హెచ్చరించారు.

బాంబు బెదిరింపులు వచ్చిన అనంతరం పోలీసులు ఎఫ్‌ఐఆర్ నమోదు చేసి బాంబు స్క్వాడ్ సహాయంతో స్టేడియంలో సోదాలు నిర్వహించారు. కానీ అక్కడ ఏమీ కనిపించలేదు. అంతకు ముందు ఢిల్లీలోని అరుణ్ జైట్లీ స్టేడియానికి కూడా బాంబు బెదిరింపులు వచ్చాయి.

ఈ స్టేడియం కోహ్లీకి ఎందుకు ప్రత్యేకం?
ఇండోర్‌లోని హోల్కర్ స్టేడియంలో ఇప్పటివరకు 3 టెస్ట్ మ్యాచ్‌లు జరిగాయి. భారత్, న్యూజిలాండ్ మధ్య మొదటి టెస్ట్ మ్యాచ్ ఇక్కడ జరిగింది. ఆ సమయంలో విరాట్ కోహ్లీ అద్భుతంగా బ్యాటింగ్ చేసి డబుల్ సెంచరీ సాధించాడు. ఈ మైదానంలో విరాట్ కోహ్లీ 211 పరుగుల ఇన్నింగ్స్ ఆడాడు. దాని వల్లే టీమిండియా విజయం సాధించింది.