రవిశాస్త్రి మద్దతు: బౌలింగ్ కోచ్‌గా భరత్ అరుణ్?

విదేశీ పర్యటనల్లో జహీర్ ఖాన్ సేవలు

ఈ నేపథ్యంలో బీసీసీఐ పరిపాలనా కమిటీ దిగొచ్చింది. జహీర్ ఖాన్ పూర్తిస్థాయి కోచ్ కాదని, కేవలం 150 రోజుల పాటు మాత్రమే బౌలింగ్ కన్సల్టెంట్‌గా సేవలందిస్తాడని అధికారిక ప్రకటన కూడా చేసింది. విదేశీ పర్యటనల్లో జహీర్ ఖాన్ సేవల్ని ఉపయోగించుకుంటామని కూడా తెలిపింది.

సీఏసీపై వినోద్ రాయ్ అసంతృప్తి

సచిన్, గంగూలీ, లక్ష్మణ్ నేతృత్వంలోని క్రికెట్ సలహా కమిటీ (సీఏసీ)కి టీమిండియా ప్రధాన కోచ్ ఎంపిక చేసే బాధ్యతల్ని మాత్రమే అప్పగించామని అయితే బౌలింగ్, బ్యాటింగ్ కన్సల్టెంట్‌లను సైతం ప్రకటించడంపై వినోద్ రాయ్ నేతృత్వంలో సీఓఏ అసంతృప్తి వ్యక్తం చేసిన సంగతి తెలిసిందే.

పెండింగ్‌లోనే ద్రవిడ్, జహీర్ ఖాన్ నియామకం

ఈ నేపథ్యంలో రాహుల్ ద్రవిడ్, జహీర్ ఖాన్‌ల నియామకాన్ని పెండింగ్‌లో ఉంచాలని బీసీసీఐని కూడా ఆదేశించారు. ప్రధాన కోచ్‌గా రవిశాస్త్రి ఎంపికను మాత్రమే సీఓఏ పూర్తిస్థాయి సమర్ధించింది. అంతేకాదు సహాయక సిబ్బందిని ఎంపిక చేసుకునే బాధ్యతను ప్రధాన కోచ్‌కు అప్పగించాలని కూడా పేర్కొంది.

బౌలింగ్ కోచ్‌గా భరత్ అరుణ్

2014 నుంచి 2016 మధ్య కాలంలో రవిశాస్త్రి టీమిండియా డైరెక్టర్‌గా పని చేసిన కాలంలో భరత్ అరుణ్ బౌలింగ్ కోచ్‌గా పని చేసిన అనుభవం ఉంది. ఈ నేపథ్యంలో రవిశాస్త్రి కొత్త కోచ్‌గా ఎంపిక కావడం అతడు కూడా భరత్ అరుణ్‌నే తనకు పూర్తిస్థాయి బౌలింగ్ కోచ్‌గా కావాలని పట్టుబడటంతో భరత్ అరుణ్ ఎంపిక ఖాయమైనట్లే కనబడుతోంది. ఈ మేరకు సోమవారం బీసీసీఐ పాలకుల కమిటీతో రవిశాస్త్రి సమావేశమై తన నిర్ణయాన్ని మరోసారి స్పష్టం చేసే అవకాశాలు కనబడుతున్నాయి.