అరే ఏంట్రా ఇది..! అసలు దానికి దీనికి ఏమన్న సింక్ ఉందా? మధ్యలో నన్నెందుకు లాగుతార్రా.. బెన్ స్టోక్స్ పరేషాన్

అసలు ఏమన్న సింక్ అవుతుందా?

ఇందులో 2019వన్డే ప్రపంచ కప్ ఫైనల్‌లో బెన్ స్టోక్స్ వీడియోపై కూడా కామెంట్లు వస్తున్నాయి. ఫైనల్లో అతను నాన్ స్ట్రైకర్ ఎండ్ వైపు పరిగెత్తుతుండగా.. ఫీల్డర్ త్రో బ్యాట్‌కు తాకి బంతి బౌండరీ వైపు దూసుకెళ్లిన సంగతి తెలిసిందే. దీంతో హైడ్రామా నడిచిన ఆ మ్యాచ్‌లో ఇంగ్లాండ్ సూపర్ ఓవర్లో చివరికి గెలుపొందింది. అయితే.. స్టోక్స్ నాన్ స్టైకర్ ఎండ్లో రన్ చేసేటప్పుడు బంతి బ్యాట్‌ను తాకి బౌండరీ వెళ్లిపోవడాన్ని ఏమంటారు అంటూ కొందరు దీప్తి శర్మ మన్కడింగ్‌తో పోల్చుతూ ట్వీట్ చేస్తున్నారు. దీనిపై బెన్ స్టోక్స్ కూడా స్పందించాడు. అసలు మన్కడింగ్‌కు, 2019లో జరిగిన ఆ బౌండరీకి ఏమన్న సింక్ ఉందా అంటూ ట్వీట్ చేశాడు. ఇలాంటి పోస్టులు చేయడం పట్ల ఆశ్చర్యపోయాడు. దీనికి సంబంధించి ఓ మీమ్ కూడా పోస్ట్ చేశాడు. స్టోక్స్ ట్వీట్ చూస్తుంటే.. అరే ఏంట్రా ఇది.. మధ్యలో నన్నెందుకు లాగుతున్నార్రా అన్నట్టుంది.

స్పష్టతనిచ్చిన దీప్తి

దీప్తి శర్మ మన్కడింగ్ విధానంలో రనౌట్ చేసిన విషయమై ఓ స్పష్టతనిచ్చింది. ముందే చార్లీ డీన్‌కు తాను వార్నింగ్ ఇచ్చానని, అంపైర్లకు కూడా ఈ విషయమై సమాచారం అందించానని భారత క్రికెటర్ దీప్తి శర్మ స్పష్టం చేసింది. 40పరుగులు చేసిన ఛార్లీ డీన్ చివరి వికెట్‌గా ఔటవ్వడంతో భారత్ 16పరుగుల తేడాతో గెలుపొందింది. ఇక ఇదే మ్యాచ్‌లో అంతర్జాతీయ క్రికెట్ నుండి ఝులన్ గోస్వామి రిటైర్మెంట్ తీసుకున్న సంగతి తెలిసిందే.

ఎంత చెప్పినా వినకుండా ముందుకెళ్తూనే ఉంది

'ఇది మా ప్రణాళికలో ఒక భాగం. ఎందుకంటే ఆమె క్రమం తప్పకుండా క్రీజు నుంచి బయటికొస్తుంది. బాల్ వేయకముందే అలా ఎలా ముందుకెళ్తావ్ అని మేము అప్పటికే ఆమెను హెచ్చరించాం. మేము నిబంధనలనే పాటించే ఔట్ చేశాం.'అని దీప్తి పేర్కొంది. 'ప్రతి జట్టు ఫీల్డ్‌లో గెలవాలని కోరుకుంటుంది. ఈ మ్యాచ్ మేం గెలవడం ద్వారా ఝులన్ గోస్వామికి ఘన వీడ్కోలు ఇచ్చినట్లయింది. జట్టుగా మేం చేయగలిగినదంతా చేశాం. ఇక రనౌట్ విషయంలో మేము అంపైర్లకు ముందే సమాచారం అందించాం, కానీ ఆమె అవేమీ పట్టించుకోకుండా క్రీజులో ముందుకు వెళ్తూనే ఉంది. ఇక మేం ఏం చేస్తాం చెప్పండి. అందుకే ఔట్ చేశా' అని దీప్తి భారత్‌కు తిరిగి వచ్చాక విలేకరులతో తెలిపింది.