ఆసీస్ పర్యటనలో కోహ్లీసేన: ట్వీట్‌తో ద్రవిడ్ రికార్డుని గుర్తు చేసిన బీసీసీఐ

హైదరాబాద్: రాహుల్ ద్రవిడ్... భారత క్రికెట్ అభిమానులకు పరిచయం అక్కర్లేని పేరు. అభిమానులు ముద్దుగా పిలుచుకునే పేరు ది వాల్, మిస్టర్ డిపెండబుల్. భారత క్రికెట్ అందించే అత్యుత్తమ బ్యాట్స్‌మన్. క్రికెట్‌లో టీ20 ఫార్మాట్ వచ్చిన తర్వాత సుదీర్ఘ ఫార్మాట్ అయిన టెస్టుల్లో నింపాదిగా ఆడే క్రికెటరే కనిపించడం లేదు.

టెస్టుల్లోనే కాదు వన్డేల్లోనూ పది వేల పరుగుల మైలురాయిని సాధించిన అరుదైన బ్యాట్స్‌మన్ రాహుల్ ద్రవిడ్. రాహుల్ ద్రవిడ్ గొప్పతనం అంతా అతడి టెక్నిక్‌లోనే ఉంది. టెక్నిక్ ఉంటే చాలు.. ఏ ఫార్మాట్ అయినా ఒకేలా ఆడగలరు అని నిరూపించాడు రాహుల్ ద్రవిడ్. అలాంటి ద్రవిడ్‌కు సంబంధించిన ఓ అరుదైన రికార్డుని బీసీసీఐ సోమవారం ట్వీట్ చేసింది.

ఇంతకీ ఆ రికార్డు ఏంటని అనుకుంటున్నారా? అంతర్జాతీయ క్రికెట్‌లో టెస్టుల్లో 30 వేలకుపైగా బంతులు ఎదుర్కొన్న ఏకైక బ్యాట్స్‌మన్ రాహుల్ ద్రవిడ్. టెస్టుల్లో మొత్తం 31258 బంతులను ఎదుర్కొన్నాడు. 200 టెస్టులు ఆడిన క్రికెట్ లెజెండ్ సచిన్‌ టెండూల్కర్‌కు కూడా ఈ రికార్డు సాధ్యం కాలేదు.

అంతర్జాతీయ క్రికెట్‌లో 52.31 యావరేజితో రాహుల్ ద్రవిడ్ 13,288 పరుగులు చేశాడు. మోడ్రన్ డే క్రికెట్‌లో ఇదే అత్యుత్తమం కావడం విశేషం. ఆస్ట్రేలియా గడ్డపై టెస్టు సిరిస్‌ను సొంతం చేసుకోవాలని సుదీర్ఘ పర్యటనకు వెళ్లిన టీమిండియాకు బీసీసీఐ ట్వీట్‌తో గుర్తు చేసింది.