వైభవ్ సూర్యవంశీకి బీసీసీఐ బంపర్ ఆఫర్!

భారత క్రికెట్ చరిత్రలోనే అరుదైన మైలురాయిని అందుకుని, కేవలం 15 ఏళ్ల ప్రాయంలోనే జాతీయ జట్టుకు ఎంపికైన యువ సంచలనం వైభవ్ సూర్యవంశీ కోసం బీసీసీఐ ఓ చారిత్రాత్మక నిర్ణయం తీసుకుంది. రాబోయే ఇంగ్లాండ్, ఐర్లాండ్ పర్యటనలకు ఎంపికైన ఈ యువ సంచలనంతో పాటు ఆయన తల్లిదండ్రులు కూడా ఇంగ్లాండ్ వెళ్లేందుకు బోర్డు ప్రత్యేకంగా అనుమతించింది. విదేశీ పిచ్‌లపై ఆడేటప్పుడు, సీనియర్ జట్టులోని ఆటగాళ్లతో కలిసి ప్రయాణించేటప్పుడు వైభవ్ ఎలాంటి ఒత్తిడికి గురికాకుండా, మానసికంగా స్థిరంగా ఉండేందుకు బీసీసీఐ ఈ అసాధారణ ఏర్పాట్లు చేసింది.

ఈ ప్రత్యేక నిర్ణయంపై బీసీసీఐ కార్యదర్శి దేవ్‌జీత్ సైకియా స్పందిస్తూ ఆసక్తికర వ్యాఖ్యలు చేశారు. వైభవ్ ఇంకా మైనర్ అని, ఇప్పటివరకు అతను తన వయసున్న ఆటగాళ్లతో కలిసి అండర్-19 స్థాయిలో ప్రయాణించాడని గుర్తుచేశారు. కానీ సీనియర్ టీమిండియా వాతావరణం పూర్తిగా భిన్నంగా ఉంటుందని, అక్కడ అందరూ పెద్దవాళ్లే ఉంటారని పేర్కొన్నారు. ఇలాంటి పరిస్థితుల్లో ఒక 15 ఏళ్ల బాలుడు కొత్త వాతావరణానికి త్వరగా అలవాటు పడాలంటే కుటుంబ సభ్యుల మద్దతు ఎంతో అవసరమని భావించి, అతని తల్లిదండ్రులను కూడా పర్యటనకు పంపాలని బోర్డు నిర్ణయించినట్లు ఆయన స్పష్టం చేశారు. ప్రస్తుతం వైభవ్ శ్రీలంకలో ఇండియా-ఏ తరఫున ఆడుతుండగా, అక్కడికి కూడా అతని తండ్రి వెళ్లనున్నారు.

సాధారణంగా అంతర్జాతీయ పర్యటనల్లో ఏ ఆటగాడికీ బీసీసీఐ ఇలాంటి సదుపాయాన్ని కల్పించదు. కానీ, వైభవ్ సూర్యవంశీ విషయంలో బోర్డు మానవీయ కోణంలో ఆలోచించింది. అతి చిన్న వయసులోనే అంతర్జాతీయ క్రికెట్ ఒత్తిడిని, విదేశీ పరిస్థితులను తట్టుకోవడానికి కుటుంబం పక్కన ఉండటం ఎంతో మేలు చేస్తుందని బోర్డు బలంగా నమ్ముతోంది. ఈ నిర్ణయం ద్వారా బీసీసీఐ వైభవ్‌ను కేవలం ఓ ప్రతిభావంతుడైన ఆటగాడిగానే కాకుండా, ఒక చిన్న పిల్లాడిగా భావించి పూర్తి బాధ్యత తీసుకుంటున్నట్లు స్పష్టమవుతోంది.

వైభవ్ సూర్యవంశీ 2026లో అద్భుతమైన ప్రదర్శన కనబరిచాడు. అండర్-19 ప్రపంచ కప్ ఫైనల్లో ఇంగ్లాండ్‌పై 175 పరుగులు చేశారు. ఆ మ్యాచ్‌లో భారత్ విజయం సాధించింది. ఐపీఎల్ 2026లో రాజస్థాన్ రాయల్స్ తరఫున వైభవ్ మెరిశారు. 16 మ్యాచ్‌లలో 776 పరుగులు సాధించాడు. 237.30 స్ట్రైక్ రేట్‌తో అందరి దృష్టిని ఆకర్షించారు. ఐపీఎల్‌లో ఆరెంజ్ క్యాప్, మోస్ట్ వాల్యూబుల్ ప్లేయర్ అవార్డులను గెలుచుకున్నారు.

వైభవ్ ప్రదర్శన పట్ల సెలక్టర్లు సంతోషంగా ఉన్నారు. అజిత్ అగార్కర్ దీనిపై ప్రత్యేకంగా మాట్లాడారు. తన ప్రదర్శనతోనే వైభవ్ జట్టులోకి ఎంపికయ్యాడని అగార్కర్ చెప్పారు. తక్కువ వయసులోనే ఒత్తిడిని తట్టుకోవడం అసాధారణమని పేర్కొన్నారు. వైభవ్ మ్యాచ్‌ను మలుపు తిప్పగల సత్తా ఉన్న ఆటగాడని తెలిపారు. భవిష్యత్తులో అతను జట్టుకు భారీగా సహకరిస్తాడని సెలక్ట్ కమిటీ ఆశిస్తోంది. ఇప్పుడు ప్రపంచ క్రికెట్ అభిమానులంతా ఈ 15 ఏళ్ల వండర్ కిడ్ ఇంగ్లాండ్ గడ్డపై అడుగుపెట్టి సచిన్ టెండూల్కర్ లాంటి దిగ్గజాల రికార్డులను తిరగరాస్తాడా లేదా అని ఆసక్తిగా ఎదురుచూస్తున్నారు.