బాబర్‌ను బలి చేసిన స్మిత్?: గ్రౌండ్‌లోనే గొడవ!! (వీడియో)

బిగ్ బాష్ లీగ్ 2026 సీజన్లో చోటుచేసుకున్న ఓ ఆసక్తికరమైన ఘటన ఇప్పుడు క్రికెట్ ప్రపంచంలో హాట్ టాపిక్‌గా మారింది. ఆస్ట్రేలియా స్టార్ బ్యాటర్ స్టీవ్ స్మిత్, పాకిస్థాన్ మాజీ కెప్టెన్ బాబర్ ఆజం మధ్య జరిగిన 'సింగిల్' వివాదం సోషల్ మీడియాలో వైరల్ అవుతోంది. సిడ్నీ సిక్సర్స్, సిడ్నీ థండర్ జట్ల మధ్య జరిగిన మ్యాచ్‌లో ఈ వింత సన్నివేశం కనిపించింది. సాధారణంగా నాన్-స్ట్రైకర్ ఎండ్‌లో ఉన్న బ్యాటర్ సింగిల్ కోసం పిలిస్తే స్ట్రైకర్ స్పందిస్తారు. కానీ స్టీవ్ స్మిత్ మాత్రం బాబర్ ఆజంను సింగిల్ తీయొద్దంటూ వారించి అందరినీ ఆశ్చర్యపరిచాడు.

అసలేం జరిగిందంటే?
మ్యాచ్ 11వ ఓవర్‌లో క్రిస్ గ్రీన్ బౌలింగ్‌లో బాబర్ ఆజం ఓ షాట్ ఆడి సింగిల్ తీయడానికి ప్రయత్నించాడు. అయితే నాన్-స్ట్రైకర్ ఎండ్‌లో ఉన్న స్టీవ్ స్మిత్ అతడిని రావద్దని సైగ చేశాడు. "పవర్ సర్జ్" ఓవర్లను తాను ఎదుర్కోవాలని, ఆ సమయంలో తాను స్ట్రైకింగ్‌లో ఉండాలని స్మిత్ భావించడమే దీనికి కారణం. ఆ సమయంలో బాబర్ ఆజం 47 బంతుల్లో 38 పరుగులతో నెమ్మదిగా ఆడుతుండగా.. స్మిత్ అప్పటికే 28 బంతుల్లో 58 పరుగులతో జోరు మీదున్నాడు. స్మిత్ నిర్ణయం పట్ల బాబర్ తీవ్ర అసంతృప్తి వ్యక్తం చేశాడు.

ఒక్క ఓవర్‌లో 32 పరుగులు.. బీబీఎల్ రికార్డ్!
స్మిత్ తన ప్లాన్ ప్రకారం బాబర్‌కు స్ట్రైకింగ్ ఇవ్వకుండా, తర్వాతి ఓవర్‌లో (12వ ఓవర్) పవర్ సర్జ్ తీసుకున్నాడు. ర్యాన్ హ్యాడ్లీ వేసిన ఆ ఓవర్‌లో స్మిత్ వరుసగా 4 సిక్సర్లతో మొత్తం 32 పరుగులు పిండుకున్నాడు. ఇది బీబీఎల్ చరిత్రలోనే అత్యంత ఖరీదైన ఓవర్‌గా నమోదైంది.

కోపంతో పెవిలియన్ చేరిన బాబర్
స్మిత్ జోరు చూసి అసహనానికి గురైన బాబర్ ఆజం.. ఆ తర్వాతి ఓవర్‌లో మొదటి బంతికే భారీ షాట్ ఆడబోయి క్లీన్ బౌల్డ్ అయ్యాడు. ఔట్ అయిన తర్వాత తీవ్ర ఆగ్రహంతో ఉన్న బాబర్, పెవిలియన్ వెళ్తూ తన బ్యాట్‌తో బౌండరీ మార్కర్‌ను బలంగా కొట్టాడు. మ్యాచ్ ముగిసిన తర్వాత ఆటగాళ్లు కరచాలనం చేసుకునే సమయంలో కూడా బాబర్ ఎక్కడా కనిపించకపోవడం గమనార్హం.

స్మిత్ ఏమన్నారంటే?
మ్యాచ్ అనంతరం తన నిర్ణయాన్ని స్మిత్ సమర్థించుకున్నాడు. "నేను చిన్న బౌండరీ ఉన్న వైపు ఆడాలని అనుకున్నాను. ఆ ఓవర్‌లో 30 పరుగులు సాధించాలని ముందే లక్ష్యంగా పెట్టుకున్నాను. మేము 32 పరుగులు సాధించాం, అది మంచి ఫలితం. నా నిర్ణయం పట్ల బాబర్ సంతోషంగా ఉన్నాడో లేదో నాకు తెలియదు" అని స్మిత్ వ్యాఖ్యానించాడు.

మాజీ క్రికెటర్ మార్క్ వా స్పందన: "బాబర్ ప్రవర్తన సరిగ్గా లేదు. మైదానంలో మీ అసహనాన్ని అలా ప్రదర్శించడం క్రీడాస్ఫూర్తి అనిపించుకోదు" అని ఫాక్స్ క్రికెట్ కామెంటరీలో ఆయన పేర్కొన్నారు.