తొలిసారి ఆసియా కప్ టోర్నీ విజేతగా బంగ్లాదేశ్

హైదరాబాద్: అత్యంత భారీ అంచనాలతో బరిలోకి దిగిన భారత మహిళా జట్టుకు చేదు అనుభవం ఎదురైంది. ఆఖరి మ్యాచ్ విజయంతో మైదానంలో అడుగుపెట్టిన హర్మన్ సేనను బంగ్లాదేశ్ మూడు వికెట్ల తేడాతో ఓడించి తొలి సారి ఆసియా కప్ టోర్నీని దక్కించుకుంది. ఇలా ఆసియా కప్‌ ఫైనల్లో బంగ్లాదేశ్ మహిళా జట్టు సంచలనం సృష్టించింది. ఉత్కంఠభరింగా సాగిన తుది పోరులో భారత జట్టుపై 3 వికెట్ల తేడాతో గెలుపొందిన బంగ్లా.. తొలిసారి ఆసియా కప్‌ను సొంతం చేసుకుంది.

ఆఖరి బంతి వరకూ విజయం కోసం పోరాడిన ఇరు జట్ల హోరాహోరీ సమరంలో బంగ్లాజట్టునే అదృష్టం వరించింది. ఇప్పటి వరకూ ఆరు సార్లు భారత జట్టు ఆసియా కప్ గెలుపొందింది. ఈసారి మాత్రం బంగ్లా జట్టు అద్వితీయమైన ఆటతీరుతో కప్ గెలుపొందింది. తద్వారా భారత్ తర్వాత ఆసియా కప్ గెలుపొందిన జట్టుగా రికార్డ్‌లకెక్కింది. 113 పరుగుల లక్ష్యంతో బరిలో దిగిన బంగ్లాదేశ్‌కు ఓపెనర్లు షామియా సుల్తానా (16), అయాషా రహ్మాన్ (17) శుభారంభం ఇచ్చారు. వీరిద్దరూ తొలి వికెట్‌కు 35 పరుగులు జోడించారు.

నిగర్ సుల్తానా 24 బంతుల్లో 27 పరుగులు చేయగా, రుమానా అహ్మద్ 23 రన్స్ చేసింది. ఆఖరి ఓవర్లలో పూనమ్ యాదవ్, దీప్తి శర్మ అద్భుతంగా బంతులేసి బంగ్లాపై ఒత్తిడి తెచ్చారు. హర్మన్ ప్రీత్ వేసిన ఆఖరి ఓవర్లో బంగ్లా విజయానికి 9 పరుగులు అవసరం కాగా.. చివరి బంతికి రెండు పరుగులు చేసిన బంగ్లాదేశ్ థ్రిల్లింగ్ విక్టరీని సొంతం చేసుకుంది. అంతకు ముందు టాస్ ఓడి ముందుగా బ్యాటింగ్ చేసిన భారత జట్టు నిర్ణీత 20 ఓవర్లలో 9 వికెట్ల నష్టానికి 112 పరుగులు చేసింది.

భారత ఇన్నింగ్స్ సాగిందిలా:
కెప్టెన్ హర్మన్ ప్రీత్ కౌర్ (42 బంతుల్లో 56) మినహా భారత బ్యాటర్లెవరూ రాణించలేదు. 12 పరుగులకే స్మృతి మంధన రూపంలో తొలి వికెట్ కోల్పోయిన భారత్ వరుస విరామాల్లో వికెట్లు కోల్పోయింది. 62 పరుగులకే ఐదు వికెట్లు కోల్పోయి కష్టాల్లో పడింది. కానీ ధాటిగా ఆడి చివరి బంతికి అవుటైన హర్మన్ ప్రీత్ కౌర్ అర్ధ సెంచరీతో జట్టును ఆదుకుంది.