బాబర్ ఆజంపై వేటు తప్పదా? పాక్ కోచ్ షాకింగ్ ఆన్సర్!

T20 World Cup 2026: పాకిస్థాన్ స్టార్ క్రికెటర్ బాబర్ ఆజం బ్యాటింగ్ స్థానం, అతని స్లో స్ట్రైక్ రేట్‌పై గత కొంతకాలంగా విమర్శలు వస్తూనే ఉన్నాయి. ప్రస్తుతం జరుగుతున్న టీ20 ప్రపంచకప్ 2026లో బాబర్ ఆజం నంబర్-4 స్థానంలో ఆడుతుండటంపై చర్చ జరుగుతోంది. ఈ నేపథ్యంలో సూపర్-8 మ్యాచ్‌లు ప్రారంభం కావడానికి ముందు పాకిస్థాన్ హెడ్ కోచ్ మైక్ హెస్సన్ దీనిపై స్పందించారు.

బాబర్ ఆజంకు అండగా నిలిచిన మైక్ హెస్సన్
శనివారం నుంచి కొలంబో వేదికగా సూపర్-8 పోరు మొదలవుతోంది. తొలి మ్యాచ్‌లో పాకిస్థాన్, న్యూజిలాండ్‌తో తలపడనుంది. ఈ కీలక మ్యాచ్‌కు ముందు మీడియా సమావేశంలో పాక్ కోచ్ మైక్ హెస్సన్ మాట్లాడుతూ బాబర్ ఆటతీరును సమర్థించారు. "జట్టుకు ప్రస్తుతం బాబర్ నుంచి ఒక ప్రత్యేకమైన పాత్ర అవసరం. ఆ విషయం బాబర్‌కు కూడా బాగా తెలుసు." అని ఆయన పేర్కొన్నారు. పవర్ ప్లేలో బాబర్ స్ట్రైక్ రేట్ 100 కంటే తక్కువగా ఉందని విమర్శలు వస్తున్న మాట నిజమేనని.. అయితే మధ్య ఓవర్లలో ఇన్నింగ్స్‌ను చక్కదిద్దడంలో బాబర్ దిట్ట అని మైక్ హెస్సన్ పేర్కొన్నారు. జట్టు కష్టాల్లో ఉన్నప్పుడు బాబర్ వంటి అనుభవం ఉన్న ఆటగాడు మిడిలార్డర్‌లో ఉండటం ఎంతో కీలకమని.. అమెరికాతో జరిగిన మ్యాచ్‌లో అతను తన సత్తా చాటాడని గుర్తు చేశారు.

నమీబియాతో మ్యాచ్‌లో బాబర్ ఎందుకు రాలేదు?
నమీబియాతో జరిగిన మ్యాచ్‌లో పాక్ రెండో వికెట్ పడ్డాక బాబర్ బ్యాటింగ్‌కు రావాల్సింది. కానీ రన్ రేట్ పెంచాల్సిన అవసరం ఉండటంతో అతని కంటే ముందుగా ఖవాజా నఫే, ఆ తర్వాత షాదాబ్ ఖాన్‌లను పంపారు. దీనిపై మైక్ హెస్సన్ వివరణ ఇస్తూ.. "ఆ మ్యాచ్‌లో 12 ఓవర్లు ముగిసిన తర్వాత బాబర్‌ను మైదానంలోకి పంపడం సరైన నిర్ణయం కాదని భావించాం. చివర్లో వేగంగా పరుగులు సాధించే ఆటగాళ్లు మా వద్ద ఉన్నారు. బాబర్ కూడా ఈ నిర్ణయాన్ని అంగీకరించాడు. జట్టు ప్రయోజనాల దృష్ట్యా కొన్నిసార్లు ఇతర ఆటగాళ్లు మెరుగ్గా ఆడగలరని మా నమ్మకం." అని ఆయన తెలిపారు.

ఆసియా కప్ తర్వాత ఒక ప్రత్యేక ప్రణాళికతోనే బాబర్‌ను జట్టులోకి తీసుకున్నామని మైక్ హెస్సన్ స్పష్టం చేశారు. సూపర్-8లో న్యూజిలాండ్‌తో జరిగే మ్యాచ్‌లో బాబర్ తన క్లాస్ ఆటతో విమర్శకులకు సమాధానం చెబుతాడో లేదో చూడాలి.