ఢిల్లీ ఓటమికి అసలు కారణం అదే: అక్షర్ పటేల్

ఐపీఎల్ 2026లో సీఎస్కే చేతిలో ఘోర పరాజయం పాలైన అనంతరం ఢిల్లీ క్యాపిటల్స్ కెప్టెన్ అక్షర్ పటేల్ తన మనసులోని మాటను పంచుకున్నాడు. మ్యాచ్ అనంతరం జరిగిన ప్రజెంటేషన్ సెషన్‌లో అక్షర్ పటేల్ మాట్లాడుతూ.. ఓటమికి గల కారణాలను విశ్లేషించడంతో పాటు, జట్టు భవిష్యత్తు ప్రణాళికలపై స్పష్టతనిచ్చాడు.

ఢిల్లీలోని అరుణ్ జైట్లీ స్టేడియం పిచ్‌పై అక్షర్ పటేల్ స్పందిస్తూ.. మొదటి ఇన్నింగ్స్‌లో వికెట్ ప్రవర్తించిన తీరును బట్టి 155 పరుగులు అనేది పోరాడదగ్గ స్కోరేనని అభిప్రాయపడ్డాడు. అయితే తమ జట్టులో ఎనిమిది మంది బ్యాటర్లు ఉన్న నేపథ్యంలో మరో 10 నుంచి 15 పరుగులు అదనంగా చేసి ఉంటే ఫలితం వేరేలా ఉండేదని అక్షర్ పటేల్ ఆవేదన వ్యక్తం చేశాడు. బంతి అప్పుడప్పుడు ఆగుతూ రావడం, లో-బౌన్స్ అవ్వడం వల్ల కొత్తగా వచ్చే బ్యాటర్లకు షాట్లు ఆడటం కష్టమైందని, కానీ క్రీజులో నిలదొక్కుకున్న వారికి పిచ్ అనుకూలించిందని అక్షర్ వివరించాడు.

సంజు శాంసన్ బ్యాటింగ్‌పై ప్రశంసలు
సీఎస్కే విజయంలో కీలక పాత్ర పోషించిన సంజు శాంసన్ ఇన్నింగ్స్‌ను అక్షర్ ప్రత్యేకంగా మెచ్చుకున్నాడు. ఓ బ్యాటర్ సెట్ అయిన తర్వాత పిచ్ చాలా సులభంగా కనిపిస్తుందని.. సంజు సరిగ్గా అదే ప్రదర్శించాడని పేర్కొన్నాడు. తమ బౌలర్లు లెంగ్త్ బాల్స్‌తో ఇబ్బంది పెట్టాలని చూసినా, సంజు తన క్లాస్ బ్యాటింగ్‌తో వాటిని సమర్థవంతంగా ఎదుర్కొన్నాడని కొనియాడాడు. 69 పరుగులకే 5 వికెట్లు పడిపోయిన స్థితి నుంచి జట్టును 155 పరుగుల దాకా తీసుకెళ్లడం తమ బ్యాటింగ్ విభాగంలో ఉన్న ఏకైక సానుకూల అంశమని అక్షర్ అభిప్రాయపడ్డాడు.

కుల్దీప్ లేని లోటు తెలిసింది..
ఢిల్లీ బౌలింగ్ వైఫల్యంపై మాట్లాడుతూ.. తన స్పిన్ భాగస్వామి కుల్దీప్ యాదవ్ లేని లోటు స్పష్టంగా కనిపించిందని అక్షర్ పటేల్ వెల్లడించాడు. మిడిల్ ఓవర్లలో కుల్దీప్ ఇచ్చే మద్దతు జట్టుకు ఎంతో కీలకమని, అతను లేకపోవడం వల్ల ప్రత్యర్థిపై ఒత్తిడి పెంచలేకపోయామని అంగీకరించాడు. వికెట్ స్లోగా ఉన్న సమయంలో కుల్దీప్ వంటి స్పిన్నర్ ఉండి ఉంటే మ్యాచ్ తమ వైపు తిరిగే అవకాశం ఉండేదని ఆయన పేర్కొన్నాడు.

భవిష్యత్తు లక్ష్యం: ఇకపై అన్నీ చావోరేవో మ్యాచ్‌లే!
ప్లే-ఆఫ్ రేసులో నిలవాలంటే ఇకపై తమకు పొరపాట్లు చేసే అవకాశం లేదని అక్షర్ పటేల్ జట్టును హెచ్చరించారు. "మేము ఇప్పుడు చాలా క్లిష్ట పరిస్థితిలో ఉన్నాం. ఇకపై మాకు లభించే ప్రతి అవకాశం, ప్రతి నిమిషం చాలా విలువైనవి. మిగిలిన మ్యాచ్‌ల్లో గెలవడమే మా ఏకైక లక్ష్యం. స్పష్టమైన ఆలోచనలతో, గెలవాలనే కసితో తదుపరి మ్యాచ్‌లకు సిద్ధమవుతాం" అని అక్షర్ పటేల్ ధీమా వ్యక్తం చేశాడు. ఢిల్లీ ప్లే-ఆఫ్ చేరాలంటే మిగిలిన నాలుగు మ్యాచ్‌ల్లోనూ అద్భుతాలు చేయాల్సిందేనని స్పష్టం చేశాడు.