ముష్ఫికర్‌ రహీమ్‌ అజేయ సెంచరీతో పోరాడినా.. ఆసీస్‌దే విజయం

రాణించిన షకీబ్‌:

382 పరుగుల భారీ లక్ష్యాన్ని ఛేదించే క్రమంలో బంగ్లాకు మంచి ఆరంభం లభించలేదు. నాలుగో ఓవర్‌లోనే ఓపెనర్‌ సౌమ్య సర్కార్‌ (10)ను ఫించ్‌ రనౌట్‌ చేశాడు. సీనియర్లు తమీమ్ (62), షకీబ్‌ (41) కలిసి ఆదుకునే ప్రయత్నం చేశారు. ఈ ఇద్దరు 14 ఓవర్ల పాటు ఆసీస్‌ను దీటుగా ఎదుర్కొంటూ రెండో వికెట్‌కు 79 పరుగుల భాగస్వామ్యం నెలకొల్పారు. 19వ ఓవర్‌లో స్టొయినిస్‌.. షకీబ్‌ను అవుట్‌ చేశాడు. భారీ ఇన్నింగ్స్ ఆడుతాడని ఆశలు పెట్టుకున్న బంగ్లాను అతడు నిరాశపరిచాడు.

పోటీపడి ఆడారు:

మరోవైపు 65 బంతుల్లో అర్ధ సెంచరీ పూర్తి చేసుకున్న తమీమ్‌ను అద్భుత బంతితో స్టార్క్‌ బౌల్డ్‌ చేయడంతో బంగ్లా కష్టాల్లో పడింది. లిటన్‌ దాస్‌ (20) కూడా ఎక్కువసేపు నిలవలేకపోయాడు. ఈ దశలో ముష్ఫికర్, మహ్ముదుల్లాలు పోటీపడి దూకుడుగా ఆడారు. 54 బంతుల్లో ముష్ఫికర్‌ అర్ధ సెంచరీ పూర్తి చేసుకోగా.. జంపా ఓవర్లో రెండు భారీ సిక్సర్లు బాదిన మహ్ముదుల్లా 41 బంతుల్లోనే అర్ధ సెంచరీ అందుకున్నాడు.

పోరాడినా ఓటమే:

ఈ జోడి ధాటిగా ఆడుతూ 80 బంతుల్లోనే 100 పరుగుల భాగస్వామ్యం నెలకొల్పారు. అయితే సాధించాల్సిన రన్‌రేట్‌ బాగా పెరిగిపోయింది. చివరి ఐదు ఓవర్లలో 82 పరుగులు కావాల్సి ఉండగా.. కూల్టర్‌ నైల్‌ 46వ ఓవర్‌లో వరుస బంతుల్లో మహ్ముదుల్లా (69; 50 బంతుల్లో 5×4, 3×6), షబ్బీర్‌ (0)లను పెవిలియన్‌కు చేర్చాడు. చివర్లో 95 బంతుల్లో ముష్ఫికర్‌ చేసిన సెంచరీ (102 నాటౌట్‌; 97 బంతుల్లో 9×4, 1×6) వృధా అయింది. స్టార్క్‌, కౌల్టర్‌నైల్‌, స్టాయినిస్‌లు తల రెండు వికెట్లు తీశారు.

వార్నర్‌ మెరుపులు:

అంతకుముందు టాస్‌ గెలిచి బ్యాటింగ్‌కు దిగిన ఆస్ట్రేలియాకు ఓపెనర్లు వార్నర్‌, ఫించ్‌ శుభారంభం అందించారు. ఈ జోడీ తొలి వికెట్‌కు 121 పరుగులు జత చేసింది. ఫించ్‌ ఔట్ అయినా వార్నర్‌ తగ్గలేదు. అతనికి ఖవాజా (72 బంతుల్లో 89; 10 ఫోర్లు) కూడా తోడవడంతో ఆసీస్ స్కోర్ పరుగులు పెట్టింది. 110 బంతుల్లో సెంచరీని పూర్తి చేసుకున్న వార్నర్‌.. మరింత చెలరేగాడు. ఈ క్రమంలో 139 బంతుల్లో 150 పరుగుల మైలురాయి అందుకున్న వార్నర్‌.. భారీ షాట్‌ కొట్టబోయి వెనుదిరిగాడు. చివర్లో మాక్స్‌వెల్‌ (32; 10 బంతుల్లో 2×4, 3×6) విరుచుకుపడడంతో ఆసీస్ 381 పరుగులు చేసింది.