వరల్డ్ కప్: కివీస్‌పై ఆస్ట్రేలియా 7 వికెట్ల తేడాతో ఘన విజయం

నాగ్‌పూర్‌: బ్రాడ్ హాడిన్, షేన్ వాట్సన్ అర్థ సెంచరీలతో ఆస్ట్రేలియా న్యూజిలాండ్‌పై ఘన విజయం సాధించింది. ప్రపంచకప్‌ వన్డే క్రికెట్‌ పోటీలో న్యూజిల్యాండ్‌ విధించిన 207 పరుగుల విజయ లక్ష్యాన్ని ఆస్ట్రేలియా 35 ఓవర్లలోనే ఛేదించింది. కేవలం 3 వికెట్లును మాత్రమే కోల్పోయింది. వాట్సన్‌ 62, హాడిన్‌ 55, పాంటింగ్‌ 12 పరుగులకు అవుటయ్యారు. మిగతా లాంఛనాన్ని క్లార్క్‌ (24) వైట్‌ (22) పూర్తి చేశారు. అంతకుముందు టాస్‌ ఓడి బ్యాటింగ్‌ చేసిన న్యూజిల్యాండ్‌ 45.1 ఓవర్లలో 206 పరుగులకు ఆలౌట్‌ అయింది.

లక్ష్య చేధనను ఆస్ట్రేలియా ఘనంగా ఆరంభించింది. ఓపెనర్లు హెడెన్‌ 39 బంతుల్లో, వాట్సన్‌ 52 బంతుల్లో అర్ధసెంచరీలు చేశారు. వీరిద్దరి భాగస్వామ్యంలో 18.1 ఒవర్‌కు 133 పరుగులు వచ్చాయి. అయితే ఇదే ఓవర్‌లో హెడెన్‌, వాట్సన్‌లిద్దరూ 2 బంతుల తేడాతో పెవిలియన్‌ చేరారు. ఆ తరువాత వచ్చిన పాంటింగ్‌ ఎక్కువ సేపు క్రీజులో నిలవలేదు. 16 పరుగులు చేసి అవుటయ్యాడు.క్లార్క్‌, వైట్‌ సునాయసంగా విజయ లక్ష్యాన్ని చిన్నది చేశారు. క్లార్క్‌, వైట్‌ల భాగస్వామ్యంలో 44 బంతుల్లో 40 పరుగులు చేసి ఆస్ట్రేలియాకు 7 వికెట్ల విజయాన్ని అందించారు.

న్యూజిల్యాండ్‌ ఆది నుంచి పరుగుల వేటలో తడబడింది. పటిష్ట ఆస్ట్రేలియా బౌలింగ్‌కు తలవంచింది. మొదటి పది ఓవర్లలో 49 పరుగులు చేసి రెండు వికెట్లు కోల్పోయింది. రెండో పవర్‌ ప్లే తీసుకున్న ఆస్ట్రేలియా 5 ఓవర్లలో 19 పరుగులు మాత్రమే ఇచ్చి 5 వికెట్లు తీసింది. మూడో పవర్‌ ప్లేను తీసుకున్న న్యూజిల్యాండ్‌ 5 ఓవర్లలో 18 పరుగులు మాత్రమే చేసింది. ఇందులో రెండు వికెట్లను కోల్పోయింది. మెక్లమ్‌(52), వెటోరీ (44) మాత్రమే చెప్పుకోదగ్గ స్కోరు చేశారు. ఇద్దరు బ్యాట్స్‌మెన్లు (ఫ్రాంక్లిన్‌, స్త్టెరిస్‌) డకవుట్‌ అయ్యారు.