రిటైర్‌మెంట్ వార్తలపై స్పందించిన ఆసీస్ కెప్టెన్ ఫించ్

బిగ్‌బాష్‌ లీగ్ తర్వాత ఆలోచిస్తా..

త్వరలోనే క్రికెట్‌కు ఫించ్ గుడ్‌బై చెప్పేస్తాడని ఆస్ట్రేలియన్ మీడియాలో వార్తలు వస్తున్నాయి. వీటిపై స్పందించిన ఫించ్.. ఈ విషయంపై ప్రస్తుతం తను ఆలోచించడం లేదని చెప్పాడు. ముందుగా తాను ఆస్ట్రేలియా డొమెస్టిక్ క్రికెట్ లీగ్ బిగ్‌బాష్‌లో ఆడతానని, ఆ తర్వాత పరిస్థితిని అంచనా వేస్తానని చెప్పాడు. ప్రస్తుతానికైతే తను ఇంకా క్రికెట్ ఆడటాన్ని, ముఖ్యంగా పొట్టి ఫార్మాట్‌లో ఆడటాన్ని బాగా ఎంజాయ్ చేస్తున్నట్లు చెప్పాడు.

ప్రపంచకప్‌లో పేలవ ప్రదర్శన..

డిఫెండింగ్ ఛాంపియన్ హోదాలో ఈ ఏడాది టీ20 ప్రపంచకప్‌ను ప్రారంభించిన ఆస్ట్రేలియా తొలి మ్యాచ్‌లోనే ఘోరపరాజయం చవిచూసింది. స్వదేశంలో జరుగుతున్న ఈ మెగా టోర్నీలో తొలి మ్యాచ్‌లో న్యూజిల్యాండ్‌ను ఎదుర్కొని, ఏకంగా 89 పరుగుల తేడాతో మట్టికరిచింది.

ఆ తర్వాత టోర్నీ మొత్తం ఈ భారీ ఓటమి వల్ల జరిగిన నష్టాన్ని పూడ్చుకోవడానికే సరిపోయింది. చిరకాల ప్రత్యర్థులు ఇంగ్లండ్‌తో మ్యాచ్ వర్షం కారణంగా రద్దవగా.. చివరకు నెట్ రన్ రేట్ కారణంగానే సెమీస్ రేసు నుంచి ఆసీస్ తప్పుకోవాల్సి వచ్చింది. దీంతో ఆ జట్టుపై విమర్శలు వెల్లువెత్తాయి.

వన్డేలకు వీడ్కోలు చెప్పేసిన ఫించ్

పొట్టి ఫార్మాట్‌పై ఫోకస్ పెంచాలని అనుకున్న ఆసీస్ కెప్టెన్ ఆరోన్ ఫించ్.. ఈ ఏడాది సెప్టెంబరు నెలలో వన్డే ఫార్మాట్‌కు వీడ్కోలు పలికాడు. టెస్టుల్లో ఫించ్‌ ఆడిన సందర్భాలే తక్కువ కాగా.. టీ20, వన్డే ఫార్మాట్లలో కొనసాగాడు. 2018లో ఆ జట్టు సారధిగా బాధ్యతలు చేపట్టి.. గతేడాది తమ దేశానికి తొలి టీ20 ప్రపంచకప్ అందించాడు.