ఘోర పరాజయంతో దిగజారిన ఆస్ట్రేలియా

373 పరుగుల భారీ తేడాతో ఓడిపోయిన ఆస్ట్రేలియా

రెండో టెస్టులో పాకిస్తాన్ చక్కటి పోరాట పటిమను ప్రదర్శించింది. ఈ క్రమంలో ఇరు జట్ల స్కోర్లు ఈ విధంగా ఉన్నాయి. తొలిఇన్నింగ్స్‌లో పాకిస్థాన్ 282 చేయగా ఆస్ట్రేలియా 50.4ఓవర్లకే 145పరుగులు చేసి ఆలౌట్ అయింది. ఇక రెండో ఇన్నింగ్స్ వచ్చేసరికి పాకిస్థాన్ 400/9 డిక్లేర్‌గా ప్రకటించింది. చేధనకు దిగిన ఆస్ట్రేలియా జట్టులో ఆరోన్ పించ్ మాత్రమే పరవాలేదనే ప్రదర్శన చేశాడు. ఇక జట్టు 164 పరుగులకే ఆలౌట్‌ అయి భారీ పరుగుల తేడాతో పరాజయాన్ని మూటగట్టుకుంది.

ఆస్ట్రేలియా 14 పాయింట్లను చేజార్చుకుని

ఈ టెస్టు సిరీస్ అనంతరం ఐసీసీ ర్యాంకింగ్స్‌ను ప్రకటించింది. దీంతో ఘోర వైఫల్యంతో సిరీస్‌ను చేజార్చుకున్న ఆస్ట్రేలియా 14 పాయింట్లను చేజార్చుకుని మూడో స్థానం నుంచి ఐదో స్థానానికి పడిపోయింది. సిరీస్ ఆరంభానికి ముందు ఆ జట్టు ఖాతాలో 116 పాయింట్లు ఉండగా.. ప్రస్తుతం అవి 102కి తగ్గిపోయాయి.

ర్యాంక్‌లో పాకిస్థాన్ ఎలాంటి మార్పు లేదు

మరోవైపు సిరీస్‌ని 1-0తో దక్కించుకున్న పాకిస్థాన్ ర్యాంక్‌లో మాత్రం ఎలాంటి మార్పు లేదు. సిరీస్‌ని 88 పాయింట్లతో ప్రారంభించిన పాక్ ఖాతాలో ప్రస్తుతం 7 పాయింట్లు చేరినా.. 95 పాయింట్లతో ఆ జట్టు ఏడో స్థానానికే పరిమితమైంది. మరో రెండు పాయింట్లు సాధించి ఉంటే.. ఆ జట్టు శ్రీలంక (97)‌ని వెనక్కి నెట్టేది. అంటే..తొలి టెస్టులో గెలిచి ఉంటే పాక్ ఆరో స్థానానికి ఎగబాకేదన్నమాట.

116 పాయింట్లతో నెం.1 స్థానాన్ని భారత్..

వెస్టిండీస్‌ని ఇటీవల 2-0తో చిత్తుగా ఓడించిన భారత్ జట్టు 116 పాయింట్లతో నెం.1 స్థానాన్ని సుస్థిరం చేసుకోగా.. తర్వాత వరుసగా దక్షిణాఫ్రికా (106), ఇంగ్లాండ్ (105), న్యూజిలాండ్ (102), ఆస్ట్రేలియా (102) టాప్-5లో ఉన్నాయి. ప్రస్తుతం విండీస్ జట్టుతో స్వదేశంలోనే పోరాడుతున్న టీమిండియా నవంబరు 21 నుంచి ఆస్ట్రేలియా పర్యటనకి వెళ్లనుంది.