Ashes Series: స్టార్ క్రికెట‌ర్‌కు క‌రోనా పాజిటివ్‌.. త‌ర్వాతి టెస్టుకు దూరం

యాషెస్ సిరీస్‌లో క‌రోనా క‌ల‌వరం కొన‌సాగుతుంది. ఇప్ప‌టికే ఇంగ్లండ్ జ‌ట్టు స్టాఫింగ్ స్టాఫ్‌లోని ఏడుగురు స‌భ్యులు క‌రోనా బారిన ప‌డ‌గా.. తాజాగా ఆస్ట్రేలియా స్టార్ బ్యాట‌ర్ ట్రావియస్‌ హెడ్‌కు క‌రోనా సోకింది. ఈ విష‌యాన్ని క్రికెట్ ఆస్ట్రేలియా అధికారికంగా ప్ర‌క‌టించింది. అయితే 28 ఏళ్ల‌ హెడ్‌కు ఎటువంటి క‌రోనా ల‌క్ష‌ణాలు లేవు. ప్ర‌తి రోజూ టీమ్ మొత్తానికి నిర్వ‌హించే క‌రోనా టెస్టుల్లో భాగంగా హెడ్‌ను కూడా ప‌రీక్షించ‌గా పాజిటివ్‌గా నిర్దార‌ణ అయింది. దీంతో హెడ్ వారం రోజులపాటు భార్య‌తో క‌లిసి మెల్‌బోర్న్‌లోనే ఐసోలేష‌న్‌లో ఉండ‌నున్నాడు. దీంతో జ‌న‌వరి 5 నుంచి సిడ్నీ వేదిక‌గా జ‌రిగే నాలుగో టెస్టు మ్యాచ్‌కు హెడ్ దూరం కానున్నాడు. దీంతో హెడ్ స్థానంలో మిచెల్ మార్ష్, నిక్ మాడిన్సన్, జోష్ ఇంగ్లిస్‌లను ఆస్ట్రేలియా జ‌ట్టులో చేర్చుకున్నారు. అయితే హోబ‌ర్ట్ వేదికగా జ‌రిగే సిరీస్‌లో చివ‌రిదైన‌ ఐదో టెస్టు మ్యాచ్‌కు హెడ్ అందుబాటులో ఉండే అవ‌కాశాలున్నాయి. కాగా క‌రోనా సోకిన వ్య‌క్తితో స‌న్నిహితంగా మెలిగిన కార‌ణంగా ఆస్ట్రేలియా కెప్టెన్ పాట్ క‌మిన్స్ రెండో టెస్ట్ మ్యాచ్‌కు దూర‌మైన సంగ‌తి తెలిసిందే.

Cricket Australia has confirmed Travis Head has tested positive to Covid-19 following a routine PCR test.

Mitchell Marsh, Nic Maddinson and Josh Inglis have joined the Australian #Ashes squad as additional cover. pic.twitter.com/zyl4j1CZcZ

— ICC (@ICC) December 31, 2021

ఇప్ప‌టివ‌ర‌కు జ‌రిగిన యాషెస్ సిరీస్‌లో ట్రావియ‌స్ హెడ్ స‌త్తా చాటాడు. ఆస్ట్రేలియా 3-0తో సిరీస్ గెలుచుకోవడంలో కీల‌క పాత్ర పోషించాడు. బ్రిస్బేన్ వేదిక‌గా జ‌రిగిన తొలి టెస్ట్‌లో హెడ్ 148 బంతుల్లోనే 152 ప‌రుగులు చేసి ఆస్ట్రేలియా మ్యాచ్ గెల‌వ‌డంలో కీల‌క పాత్ర పోషించాడు. అంతే కాకుండా సిరీస్‌లో అత్య‌ధిక ప‌రుగులు చేసిన ఆట‌గాళ్ల జాబితాలో ఇంగ్లండ్ కెప్టెన్ జో రూట్ త‌ర్వాత హెడ్ రెండో స్థానంలో ఉన్నాడు. ఇప్ప‌టివ‌ర‌కు సిరీస్‌లో హెడ్ ఒక సెంచ‌రీ, ఒక హాఫ్ సెంచ‌రీతో 248 ప‌రుగులు చేశాడు.

కెరీర్‌లో ఇప్ప‌టివ‌ర‌కు 22 టెస్ట్ మ్యాచ్‌లు ఆడిన హెడ్ 42 స‌గ‌టుతో 1401 ప‌రుగులు చేశాడు. ఇందులో 3 సెంచ‌రీలు, 8 హాఫ్ సెంచ‌రీలు ఉన్నాయి. అలాగే 42 వ‌న్డే మ్యాచ్‌ల్లో 34 స‌గ‌టుతో 1273 ప‌రుగులు చేశాడు. ఇందులో ఒక సెంచ‌రీ, 10 హాఫ్ సెంచ‌రీలు ఉన్నాయి. అత్య‌ధిక స్కోర్ 128 ప‌రుగులు. ఇక 16 టీ20 మ్యాచ్‌ల్లో 26 స‌గటుతో 319 ప‌రుగులు చేశాడు. అత్య‌ధిక స్కోర్ 48 ప‌రుగులు. ఐపీఎల్‌లో కూడా 10 మ్యాచ్‌లు ఆడిన హెడ్ 29 స‌గటుతో 205 ప‌రుగులు చేశాడు. ఒక హాఫ్ సెంచ‌రీ సాధించ‌గా.. అత్య‌ధిక స్కోర్ 75.