ఆసీస్ 65/2, 348 అవసరం

పెర్త్: పెర్త్ లో భారత్ పై జరుగుతున్న మూడో టెస్టు మ్యాచు మూడో రోజు శుక్రవారం ఆట ముగిసే సమయానికి ఆస్ట్రేలియా తన రెండో ఇన్నింగ్సులో రెండు వికెట్ల నష్టానికి 65 పరుగులు చేసింది. భారత్ నిర్దేశించిన 413 పరుగుల లక్ష్యాన్ని ఛేదించే క్రమంలో ఆసీస్ తన ఇద్దరు ఓపెనర్లను 43 పరుగులకే కోల్పోయింది. ఈ మ్యాచ్ గెలవడానికి ఆసీస్ ఇంకా 348 పరుగులు చేయాల్సి ఉంది. ఇంకా రెండు రోజుల సమయం ఉంది. దీంతో పెర్త్ టెస్టు రసకందాయంలో పడింది.

రోజర్స్ 15 పరుగులు, జాక్విస్ 16 పరుగులు చేసి అవుటయ్యారు. రెండు వికెట్లు కూడా ఇర్ఫాన్ పఠాన్ కే దక్కాయి. ఆట ముగిసే సమయానికి ఆసిస్ కెప్టెన్ రికీ పాంటింగ్ 24 పరుగులతో, హస్సీ 5 పరుగులతో క్రీజులో ఉన్నారు. అంతకు ముందు 294 పరుగుల వద్ద భారత్ రెండో ఇన్నింగ్సు ముగిసింది.