Asian Games 2026: పసిడి వేటలో 10 జట్లు.. క్రికెట్ షెడ్యూల్ వచ్చేసింది!

Asian Games 2026: జపాన్‌లోని ఐచి-నాగోయా వేదికగా జరగనున్న ఆసియా క్రీడలు 2026 కోసం క్రికెట్ షెడ్యూల్ అధికారికంగా విడుదలైంది. ఈ మెగా ఈవెంట్‌లో ఆసియాలోని 10 అగ్రశ్రేణి జట్లు పసిడి పతకం కోసం హోరాహోరీగా తలపడనున్నాయి. ముఖ్యంగా భారత్, పాకిస్థాన్, శ్రీలంక, బంగ్లాదేశ్ వంటి జట్ల మధ్య గట్టి పోటీ నెలకొనే అవకాశం ఉంది. గత ఎడిషన్‌లో స్వర్ణ పతకాలను గెలుచుకున్న భారత మెన్స్, ఉమెన్స్ జట్లు ఈ సారి కూడా హాట్ ఫేవరెట్లుగా బరిలోకి దిగుతున్నాయి.

ఈ క్రీడలు జపాన్‌లోని ఐచి ప్రిఫెక్చర్‌లో ఉన్న కోరోగి అథ్లెటిక్ పార్క్ వేదికగా నిర్వహించబడతాయి. అధికారిక షెడ్యూల్ ప్రకారం, క్రికెట్ మ్యాచ్‌లు సెప్టెంబర్ 17 నుంచి అక్టోబర్ 3 వరకు జరుగుతాయి. ఆసియా క్రీడలు ప్రధానంగా సెప్టెంబర్ 19న ప్రారంభమైనప్పటికీ, క్రికెట్ ఈవెంట్ రెండు రోజుల ముందే మొదలవుతుంది. ఈ టోర్నమెంట్ అంతా టీ20 (T20) ఫార్మాట్‌లో సాగుతుంది. భారత కాలమానం ప్రకారం మ్యాచ్‌లు ఉదయం 5:30 గంటలకు, మధ్యాహ్నం మ్యాచ్‌లు ఉదయం 10:30 గంటలకు ప్రారంభమవుతాయి.

మహిళల క్రికెట్ టోర్నమెంట్ సెప్టెంబర్ 17న ప్రారంభమై, సెప్టెంబర్ 22న మెడల్ మ్యాచ్‌లతో ముగుస్తుంది. ఇందులో మొత్తం 8 జట్లు పాల్గొంటాయి, ఇవి నేరుగా క్వార్టర్ ఫైనల్స్ (నాకౌట్) ఫార్మాట్‌లో తలపడతాయి. భారత మహిళల జట్టు డిఫెండింగ్ ఛాంపియన్‌గా బరిలోకి దిగుతుండటంతో అందరి దృష్టి వారిపైనే ఉంది. మరోవైపు పురుషుల క్రికెట్ పోటీలు సెప్టెంబర్ 24 నుంచి ప్రారంభమై అక్టోబర్ 3న ముగుస్తాయి. ఇందులో మొత్తం 10 జట్లు పాల్గొంటాయి. ర్యాంకింగ్స్ ఆధారంగా టాప్-4 సీడెడ్ జట్లు నేరుగా క్వార్టర్ ఫైనల్స్‌కు చేరుకుంటాయి, మిగిలిన ఆరు జట్లు మిగతా నాలుగు స్థానాల కోసం ప్రిలిమినరీ రౌండ్లలో తలపడతాయి.

ముఖ్యమైన తేదీలు (షెడ్యూల్)
క్రికెట్ ఈవెంట్ సెప్టెంబర్ 17 నుండి అక్టోబర్ 3 వరకు నిర్వహించబడుతుంది.

*మహిళల క్రికెట్- సెప్టెంబర్ 17, 2026(ప్రారంభం)-సెప్టెంబర్ 22, 2026(ముగింపు)
*పురుషుల క్రికెట్-సెప్టెంబర్ 24, 2026(ప్రారంభం)-అక్టోబర్ 3, 2026(ముగింపు)

గత 2023 ఆసియా క్రీడల్లో భారత్ అద్భుత ప్రదర్శన కనబరిచింది. పురుషుల జట్టుకు రుతురాజ్ గైక్వాడ్ నాయకత్వం వహించగా.. వర్షం కారణంగా ఫైనల్ రద్దయినా ర్యాంకింగ్ ఆధారంగా భారత్‌కు గోల్డ్ మెడల్ దక్కింది. మహిళల జట్టు కూడా హర్మన్‌ప్రీత్ కౌర్ సారథ్యంలో స్వర్ణాన్ని కైవసం చేసుకుంది. ఈసారి కూడా భారత క్రికెట్ నియంత్రణ మండలి (BCCI) పటిష్టమైన జట్లను పంపేందుకు సిద్ధమవుతోంది. ముఖ్యంగా యువ ఆటగాళ్లకు ఇదొక గొప్ప వేదిక కానుంది.