Asia Cup Rising Stars: డిఫెండింగ్ ఛాంపియన్‌కు షాక్! సెమీస్‌ ఇండియా ఫైట్ ఫిక్స్!

Asia Cup Rising Stars 2025: ఆసియా కప్ రైజింగ్ స్టార్స్ 2025 టోర్నమెంట్ నుంచి డిఫెండింగ్ ఛాంపియన్ ఆఫ్ఘనిస్తాన్ జట్టు నిష్క్రమించింది. ఈ సారి ఆ జట్టుకు సెమీ-ఫైనల్లో కూడా స్థానం దక్కలేదు. గ్రూప్ రౌండ్‌లో ఆఫ్ఘనిస్తాన్ జట్టు మూడో స్థానంలో నిలిచింది. గ్రూప్-ఏ నుంచి పాకిస్తాన్, భారత్ సెమీ-ఫైనల్లోకి ప్రవేశించగా.. గ్రూప్-బి నుంచి బంగ్లాదేశ్, శ్రీలంక జట్లు సెమీస్‌లో చోటు దక్కించుకున్నాయి. ఆఫ్ఘనిస్తాన్‌కు శ్రీలంక, బంగ్లాదేశ్‌తో సమానమైన పాయింట్లు ఉన్నప్పటికీ.. తక్కువ నెట్ రన్ రేట్ కారణంగా జట్టు టోర్నమెంట్ నుంచి వైదొలగాల్సి వచ్చింది.

ఇండియా-ఎ Vs బంగ్లాదేశ్-ఎ
ఆసియా కప్ రైజింగ్ స్టార్స్ మొదటి సెమీస్ మ్యాచ్‌లో ఇండియా-ఎ జట్టు బరిలోకి దిగనుంది. ఈ జట్టు బంగ్లాదేశ్-ఎ తో తలపడుతుంది. ఈ మ్యాచ్ నవంబర్ 21న భారత కాలమానం ప్రకారం మధ్యాహ్నం 3 గంటలకు ప్రారంభమవుతుంది. ఇండియా-ఎ తమ గ్రూప్‌లో రెండో స్థానంలో నిలిచింది. పాకిస్తాన్‌పై ఓటమి చవిచూసినప్పటికీ.. యూఏఈ, ఒమన్‌లపై తమ మ్యాచ్‌లను గెలుచుకుంది. బంగ్లాదేశ్ తమ గ్రూప్‌లో మొదటి స్థానంలో నిలిచింది. బంగ్లాదేశ్ జట్టు ఆఫ్ఘనిస్తాన్, హాంకాంగ్‌లను ఓడించింది. అయితే శ్రీలంక చేతిలో ఓడిపోయింది.

పాకిస్తాన్-ఎ Vs శ్రీలంక-ఎ మధ్య పోరు
టోర్నమెంట్ రెండో సెమీ-ఫైనల్ మ్యాచ్ పాకిస్తాన్-ఎ, శ్రీలంక-ఎ మధ్య జరుగుతుంది. ఈ మ్యాచ్ నవంబర్ 21న రాత్రి 8 గంటలకు ప్రారంభమవుతుంది.ఈ రెండు మ్యాచ్‌లు దోహాలోని వెస్ట్ ఎండ్ ఇంటర్నేషనల్ క్రికెట్ స్టేడియంలో జరుగుతాయి. పాకిస్తాన్-ఎ టోర్నమెంట్‌లో ఇప్పటివరకు ఓటమి ఎరుగని ఏకైక జట్టు. సెమీ-ఫైనల్స్‌లో గెలిచిన రెండు జట్లు ఫైనల్‌కు చేరుకుంటాయి. నవంబర్ 23, ఆదివారం నాడు ఆసియా కప్ రైజింగ్ స్టార్స్ 2025 కొత్త విజేత ఎవరో తెలిసిపోనుంది. సెమీ-ఫైనల్‌కు చేరుకున్న జట్లలో బంగ్లాదేశ్ మాత్రమే ఇప్పటివరకు ఈ టోర్నమెంట్‌ను గెలవలేదు.

సెమీ-ఫైనల్స్ షెడ్యూల్
*సెమీ-ఫైనల్-1- 21 నవంబర్ 2025 ఇండియా-ఎ Vs బంగ్లాదేశ్-ఎ, మధ్యాహ్నం 03:00 గంటలకు
సెమీ-ఫైనల్-2 -21 నవంబర్ 2025 పాకిస్తాన్-ఎ Vs శ్రీలంక-ఎ, రాత్రి 08:00 గంటలకు