Pakistan Playing XI: ఆసియా కప్ ఫైనల్.. భారత్‌తో తలపడే పాక్ తుది జట్టు ఇదే!

Pakistan Playing XI: ఆసియా కప్ 2025లో నేడు భారత్, పాకిస్తాన్ జట్ల మధ్య ఫైనల్ మ్యాచ్ జరగనుంది. ఆసియా కప్ ట్రోఫీ కోసం జరిగే ఈ మహాపోరు కోసం అభిమానులు అత్యంత ఉత్సాహంతో ఎదురుచూస్తున్నారు. దుబాయ్ ఇంటర్నేషనల్ క్రికెట్ స్టేడియం టికెట్లన్నీ ఇప్పటికే అమ్ముడైపోయాయి. ఈ టోర్నమెంట్‌లో టీమిండియా గత రెండు మ్యాచ్‌ల్లోనూ పాకిస్తాన్‌ను ఓడించి ఆత్మవిశ్వాసంతో ఉంది. మరోవైపు, ఫైనల్‌కు ముందు టీమిండియాలో జస్ప్రీత్ బుమ్రా, శివమ్ దూబే వంటి కీలక ఆటగాళ్లు తిరిగి వచ్చే అవకాశం ఉంది. అయితే ఈ బిగ్ ఫైనల్‌లో పాకిస్తాన్ తమ ప్లేయింగ్ XIలో ఏమైనా మార్పులు చేస్తుందా అనే చర్చ జరుగుతోంది.

పాకిస్తాన్ ప్లేయింగ్ XIలో మార్పులుంటాయా?
ఆసియా కప్ 2025 ప్రారంభంలో పాకిస్తాన్ ఆడిన జట్టుకు, ప్రస్తుత జట్టుకు చాలా తేడా ఉంది. సరైన జట్టు కూర్పును కనుగొనడానికి పాకిస్తాన్‌కు చాలా సమయం పట్టింది. సూపర్-4లో భారత్ చేతిలో దారుణంగా ఓడిన తర్వాత, శ్రీలంక, బంగ్లాదేశ్‌లపై విజయం సాధించి పాకిస్తాన్ ఫైనల్‌కు చేరుకుంది.పాకిస్తాన్ తమ చివరి రెండు మ్యాచ్‌ల్లో విజయం సాధించి మంచి ఊపుతో ఉంది. కాబట్టి, ఫైనల్‌లో ప్లేయింగ్ XIలో మార్పులు చేసే అవకాశం తక్కువ. పాకిస్తాన్ కెప్టెన్ సల్మాన్ అలీ ఆఘా ఇప్పటికే బ్యాటింగ్‌లో ఫామ్ కోల్పోయినప్పటికీ, సైమ్ ఆయుబ్ ఫైనల్‌లో ఆడతాడని స్పష్టం చేశాడు.