PAK vs BAN: బంగ్లా ముందు స్వల్ప లక్ష్యం.. ఫైనల్ పోరుకు సిద్ధమయ్యేదెవరు?

PAK vs BAN: ఆసియా కప్ 2025 ఫైనల్ మ్యాచ్‌లో టాస్ ఓడి ముందుగా బ్యాటింగ్ చేసిన పాకిస్థాన్ జట్టు నిర్ణీత 20 ఓవర్లలో 8 వికెట్ల నష్టానికి 135 పరుగులు చేసింది. భారత్‌తో ఫైనల్‌లో తలపడాలంటే, బంగ్లాదేశ్ జట్టు ఇప్పుడు 136 పరుగులు చేయాల్సి ఉంటుంది. ఫహీమ్ అష్రఫ్ 9 బంతుల్లో 14 పరుగులతో, హారిస్ రౌఫ్ 3 పరుగులతో నాటౌట్‌గా నిలిచారు. ముస్తాఫిజుర్ రెహమాన్ వేసిన చివరి ఓవర్‌లో పాకిస్థాన్‌కు 11 పరుగులు వచ్చాయి. అయితే, పాక్‌కు అత్యవసరమైన భారీ స్కోరు మాత్రం చివరి ఓవర్‌లోనూ రాలేదు.

మొదట తడబడిన పాకిస్థాన్ ఇన్నింగ్స్ ఒక దశలో 5 వికెట్ల నష్టానికి 49 పరుగులు చేసి, వంద పరుగులు దాటడం కూడా కష్టమేనా అనిపించింది. అయితే, ఈ ఆసియా కప్‌లో ఇది మొదటిసారి కాదు, పాకిస్థాన్ లోయర్ ఆర్డర్ (Lower Order) మరోసారి జట్టును ఆదుకుంది. ముఖ్యంగా, మహమ్మద్ హారిస్ చేసిన 31 పరుగులు జట్టు స్కోరు పెంచడంలో చాలా కీలకంగా మారాయి.

పాకిస్థాన్ టాప్, మిడిల్ ఆర్డర్ వైఫల్యాలను ఈ ఇన్నింగ్స్ మరోసారి హైలైట్ చేసింది. ఆరంభంలోనే కీలక వికెట్లు కోల్పోయి పాక్ తడబడింది. అయితే, షాహీన్ అఫ్రిది (13 బంతుల్లో 19), మహమ్మద్ నవాజ్ (15 బంతుల్లో 25), మహమ్మద్ హారిస్ (23 బంతుల్లో 31) చేసిన మెరుపు ప్రదర్శనలు ఇన్నింగ్స్‌కు కొంత బలాన్నిచ్చాయి. ఫహీమ్ అష్రఫ్ చివర్లో కొన్ని పరుగులు జోడించడంతో స్కోరు 130 మార్కును దాటింది. ఈ పిచ్‌పై 135 పరుగులు చాలా తక్కువగా కనిపిస్తున్నాయి. బంగ్లాదేశ్ తమ లక్ష్యాన్ని సులభంగా ఛేదిస్తుందని ఆత్మవిశ్వాసంతో ఉంది. పాకిస్థాన్ బౌలర్లు అద్భుతం చేస్తే తప్ప, ఈ లక్ష్యాన్ని కాపాడుకోవడం కష్టం. బంగ్లాదేశ్ బౌలర్లలో తస్కిన్ అహ్మద్ 3 వికెట్లు, మెహదీ హసన్, రిషాద్ హుస్సేనే తలో రెండు వికెట్లు పడగొట్టారు. ముస్తాఫిజుర్ రెహ్మాన్ ఒక వికెట్ తీశాడు.