ఆసియా కప్: 'ఈ పునరాగమనాన్ని ఎప్పటికీ గుర్తుపెట్టుకుంటా'

అత్యుత్తమ ప్రదర్శన ఇచ్చేందుకు ప్రయత్నిస్తా

"ఎప్పుడు అవకాశం లభించినా నా సామర్థ్యానికి తగినట్లుగా అత్యుత్తమ ప్రదర్శన ఇచ్చేందుకు ప్రయత్నిస్తా. ఇప్పుడు మళ్లీ ఆ అవకాశం వచ్చింది. చాలా ఆనందంగా అనిపిస్తోంది. కుల్దీప్, చాహల్‌ బ్యాట్స్‌మెన్‌పై ఒత్తిడి పెంచడం వల్ల నేను వికెట్లు తీయడం సులువైంది. నా ప్రతిభపై నాకు నమ్మకం ఉంది. నేను ఇంకా రాటుదేలాల్సిన అవసరం ఉంది" అని జడేజా అన్నాడు.

ఎవరికీ ప్రూవ్‌ చేసుకోవాల్సిన అవసరం లేదు

"కానీ నేను ఏమి చేయగలను అనే విషయంలో ఎవరికీ ప్రూవ్‌ చేసుకోవాల్సిన అవసరం లేదు. ప్రతీ మ్యాచ్‌లో నా బాధ్యత నెరవేర్చాలి. పాకిస్తాన్‌తో పాటు తర్వాతి మ్యాచ్‌లలో కూడా రాణించాలని పట్టుదలగా ఉన్నా" అని జడేజా చెప్పుకొచ్చాడు. వచ్చే వరల్డ్‌కప్‌లో స్థానంపై అడిగిన ప్రశ్నపై జడేజా స్పందిస్తూ.. ఇప్పుడే దాని గురించి ఆలోచించడం లేదని అన్నాడు.

గతేడాది జులైలో భారత్ తరుపున చివరిసారిగా

గత ఏడాది జూలైలో రవీంద్ర జడేజా భారత్‌ తరఫున చివరిసారిగా వన్డే బరిలోకి దిగాడు. కింగ్‌స్టన్‌లో వెస్టిండీస్‌తో జరిగిన ఆ మ్యాచ్‌లో అతను ఒక్క వికెట్‌ కూడా తీయలేదు. ఆ మ్యాచ్‌లో మొత్తం 10 ఓవర్లు బౌలింగ్ చేసిన జడేజా 0/27తో నిరాశపరిచాడు. ఆ తర్వాత జరిగిన టీ20 మ్యాచ్‌లోనూ 3.3 ఓవర్లు వేసి ఏకంగా 41 పరుగులు సమర్పించుకోవడంతో అతడిని సెలక్టర్లు పక్కన పెడుతూ వచ్చారు.

పరిమిత ఓవర్ల క్రికెట్‌కి దూరమైన జడేజా

దీనికి తోడు భారత చైనామన్ స్పిన్నర్లు కుల్దీప్ యాదవ్, చాహల్ రాణిస్తుండటంతో ఏడాదిగా జడేజా పరిమిత ఓవర్ల క్రికెట్‌కి దూరమయ్యాడు. తాజాగా ఆసియా కప్‌ జట్టులో కూడా అతని పేరు లేదు. జడేజా ఆఖరి మ్యాచ్‌ తర్వాతి నుంచి బుధవారం పాక్‌తో మ్యాచ్‌ వరకు భారత్‌ 27 వన్డేలు ఆడింది. కెప్టెన్‌ కోహ్లీ అండగా చాహల్, కుల్దీప్‌ జట్టులో రాణించడంతో జడేజా అవసరం లేకుండా పోయింది.

మూడో స్పిన్నర్‌గా జట్టులోకి

పాకిస్థాన్‌తో వన్డేలో హార్దిక్‌ పాండ్యా గాయపడటంతో శుక్రవారం బంగ్లాతో వన్డేలో జడేజా అనుకోకుండా అవకాశం దక్కించుకున్నాడు. అతను మూడో స్పిన్నర్‌గా జట్టులోకి వచ్చాడు. రాక రాక వచ్చిన ఈ అవకాశాన్ని జడేజా పూర్తిగా సద్వినియోగం చేసుకున్నాడు. ఈ మ్యాచ్‌లో 10 ఓవర్లు వేసిన జడేజా 29 పరుగులే ఇచ్చి 4 వికెట్లు తీశాడు.

నాలుగు వికెట్లు తీయడం ఇదే మొదటిసారి

2014 ఆగస్టు తర్వాత జడేజా ఇన్నింగ్స్‌లో నాలుగు వికెట్లు తీయడం ఇదే మొదటిసారి. మ్యాచ్‌ గెలిపించే ప్రదర్శనతో తనను తర్వాతి మ్యాచ్‌కూ ఎంపిక చేయక తప్పని పరిస్థితి కల్పించాడు. ఆదివారం పాక్‌తో పోరులో ఇద్దరు స్పిన్నర్లనే ఆడించాలనుకుంటే.. ఇంతకుముందు జడేజా స్థానానికి ఎసరు పెట్టిన ఇద్దరు స్పిన్నర్లలో ఒకరిపై వేటు వేయాల్సిందే మరి.