గిల్ పొరపాటు.. ఆగ్రహంతో ఊగిపోయిన నెహ్రా! (వీడియో)

ఐపీఎల్ 2026 సీజన్లో భాగంగా బుధవారం రాత్రి అరుణ్ జైట్లీ స్టేడియంలో ఢిల్లీ క్యాపిటల్స్, గుజరాత్ టైటాన్స్ జట్ల మధ్య జరిగిన మ్యాచ్ అత్యంత ఉత్కంఠను రేకెత్తించింది. గత మ్యాచ్‌లో రాజస్థాన్ రాయల్స్ చేతిలో ఓటమి పాలైన గుజరాత్ టైటాన్స్.. ఈ మ్యాచ్‌లో మాత్రం అదృష్టం కలిసి రావడంతో కేవలం ఒక్క పరుగు తేడాతో ఢిల్లీపై ఘన విజయం సాధించింది. తద్వారా ఈ సీజన్లో తన పాయింట్ల ఖాతాను తెరిచి ఢిల్లీ విజయపరంపరకు అడ్డుకట్ట వేసింది.

గిల్ పొరపాటు.. నెహ్రా అసహనం
ఈ హై-వోల్టేజ్ మ్యాచ్‌లో గుజరాత్ హెడ్ కోచ్ ఆశిష్ నెహ్రా తన సహనాన్ని కోల్పోయిన ఓ ఆసక్తికర సంఘటన చోటుచేసుకుంది. ఢిల్లీ ఇన్నింగ్స్ 16వ ఓవర్లో అశోక్ శర్మ వేసిన బంతిని ట్రిస్టన్ స్టబ్స్ ఆడి సింగిల్ తీసేందుకు ప్రయత్నించాడు. ఫీల్డింగ్ చేస్తున్న కెప్టెన్ శుభ్‌మన్ గిల్ వేగంగా స్పందించి బంతిని స్ట్రైకర్ ఎండ్‌కు త్రో చేశాడు. అయితే ఆ బంతి నేరుగా వికెట్లను తాకి బౌండరీకి వెళ్లిపోయింది. దీనివల్ల ఢిల్లీకి ఉచితంగా 4 ఓవర్‌త్రో పరుగులు లభించాయి. కీలక సమయంలో ఇలా అనవసరంగా పరుగులు ఇవ్వడం డగౌట్లో ఉన్న ఆశిష్ నెహ్రాకు తీవ్ర ఆగ్రహాన్ని తెప్పించింది.

డగౌట్లో నెహ్రా కేకలు
నిర్ణయాత్మక దశలో శుభ్‌మన్ గిల్ చేసిన ఈ చిన్న పొరపాటుకు ఆశిష్ నెహ్రా ఒక్కసారిగా అసహనానికి లోనయ్యారు. కోపంతో ఊగిపోతూ గట్టిగా కేకలు వేయడం కెమెరాల్లో రికార్డయ్యింది. ఆ సమయంలో ఆశిష్ నెహ్రా పక్కనే స్టార్ పేసర్ ఇషాంత్ శర్మ కూడా ఉన్నారు. కెప్టెన్ అని కూడా చూడకుండా శుభ్‌మన్ గిల్ ప్రదర్శనపై ఆశిష్ నెహ్రా స్పందించిన తీరుకు సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. గెలిచే మ్యాచ్‌లలో ఇటువంటి అదనపు పరుగులు ఇవ్వడం ఎంత ప్రమాదకరమో ఆశిష్ నెహ్రా ఎక్స్‌ప్రెషన్స్ చూస్తే అర్థమవుతోంది.

చివరి బంతి వరకు ఉత్కంఠ
మ్యాచ్ చివరి దశలో ఢిల్లీ విజయానికి 2 బంతుల్లో 2 పరుగులు కావాల్సిన సమయంలో వాతావరణం మరింత వేడెక్కింది. క్రీజులో ఉన్న డేవిడ్ మిల్లర్ సింగిల్ తీసే అవకాశం ఉన్నా నిరాకరించడం, ఆ తర్వాత చివరి బంతికి కుల్దీప్ యాదవ్ రనౌట్ అవ్వడంతో ఢిల్లీ ఓటమి ఖాయమైంది. గుజరాత్ బౌలర్లు ఒత్తిడిలోనూ అద్భుతంగా బంతులు వేసి జట్టుకు విజయాన్ని అందించారు. ముందుగా బ్యాటింగ్ చేసిన గుజరాత్ జట్టులో శుభ్‌మన్ గిల్(70), జోస్ బట్లర్(52), వాషింగ్టన్ సుందర్(55) హాఫ్ సెంచరీలు చేయడంతో గుజరాత్ టైటాన్స్ జట్టు 210 పరుగుల భారీ స్కోరు సాధించడంలో కీలక పాత్ర పోషించారు.