Ashes 2023: బెయిర్‌స్టో స్టంపౌట్‌లో తప్పు ఎవరిది?.. క్లియర్‌గా చెప్పేసిన లెజెండరీ అంపైర్!

యాషెస్ సిరీస్‌ను బెయిర్‌స్టో రనౌట్ బాగా వేడెక్కించింది. ఇంగ్లండ్, ఆస్ట్రేలియా మాజీ దిగ్గజాలు కూడా తమ తమ జట్లకు మద్దతుగా వ్యాఖ్యలు చేశారు. చివరకు ఆయా దేశ ప్రధానులు కూడా తమ ఆటగాళ్లను వెనకేసుకొచ్చారు. ఈ విషయంలో ఇంగ్లిష్ మీడియా అంతా కలిసి బెయిర్‌స్టోను అన్యాయంగా అవుట్ చేశారని, ఇది క్రీడాస్ఫూర్తికి విరుద్ధమని తెగ గొడవ చేస్తున్నారు.

ఈ నేపథ్యంలోనే వివాదంపై లెజెండరీ అంపైర్ సైమన్ టాఫెల్ స్పందించాడు. ఈ అవుట్‌లో తప్పు ఎవరిది? అనే విషయంపై క్లారిటీ ఇచ్చేశాడు. ఆస్ట్రేలియా ఎలాంటి తప్పు చేయలేదని, అంపైర్లు తీసుకున్న నిర్ణయాన్ని ఇంగ్లండ్ స్వీకరించాలని తేల్చిచెప్పాడు. 'ఈ విషయంలో అంపైర్ తీసుకున్న నిర్ణయం సరైనదే. ఇంగ్లండ్‌కు అది నచ్చలేదు. అందుకే ఈ గొడవ. రెండు టీమ్స్ బంతిని వేదిలేసే వరకు బంతి డెడ్ కాదు' అని క్లియర్‌గా చెప్పేశాడీ మాజీ అంపైర్.

'ఓవర్ పూర్తయింది అనుకోవాలన్నా.. బంతి డెడ్ అనుకోవాలన్నా.. ఎప్పుడైనా రెండు జట్లు బంతిని వదిలేయాలి. అప్పుడే బంతి డెడ్ అవుతుంది. ఈ ఘటనలో ఫీల్డింగ్ చేస్తున్న జట్టు.. బంతిని ఇంకా వదిలేయలేదు' అని సైమన్ టాఫెల్ స్పష్టం చేశాడు. ఏదేమైనా ఈ గొడవతో యాషెస్ సిరీస్‌లో హీట్ పెరిగింది. ఇప్పటికే ఇంగ్లండ్ 0-2తో వెనుకపడి ఉంది. అయితే ఈ ఘటన కారణంగా మూడో టెస్టులో ఇంగ్లండ్ మరింత పట్టుదలగా ఆడటం ఖాయంగా కనిపిస్తోంది.

ఈ ఘటన వల్ల రెండు జట్ల ఆటగాళ్ల మధ్య స్నేహం ఇక కుదరదని, ఇది కచ్చితంగా క్రీడాస్ఫూర్తికి వ్యతిరేకమేనని ఇంగ్లండ్ కోచ్ బ్రెండన్ మెకల్లమ్ కూడా అన్నాడు. ఈ మ్యాచ్‌లో ఎలాగైనా గెలిచేందుకు ఇంగ్లండ్ తమ టీంలో కొన్ని మార్పులు చేసే అవకాశాలు స్పష్టంగా కనిపిస్తున్నాయి. అదే సయమంలో నాథన్ లియాన్ లేకుండా ఆసీస్ బరిలో దిగడం ఇంగ్లండ్‌కు బాగా కలిసొచ్చే అంశంగా కనపడుతోంది.