అర్ష్‌దీప్ సింగ్, మోర్నే మోర్కెల్ మధ్య WWE ఫైట్?.. వైరల్ వీడియో వెనుక ఉన్న నిజమిదే?

IND vs ENG 2nd Test: ఇండియా, ఇంగ్లండ్ జట్ల మధ్య అండర్సన్-టెండూల్కర్ ట్రోఫీ జరుగుతోంది. ఈ సిరీస్‌లో మొత్తం 5 టెస్ట్ మ్యాచ్‌లు ఆడబడతాయి. సిరీస్‌లోని మొదటి మ్యాచ్‌లో టీమిండియా ఓటమిని చవిచూసింది. ఈ ట్రోఫీలో భాగంగా భారత జట్టు ప్రాక్టీస్ సెషన్ సమయంలో కొన్ని సరదా క్షణాలు కనిపించాయి. యువ బౌలర్లు అర్ష్‌దీప్ సింగ్, ఆకాష్ దీప్‌లు బౌలింగ్ కోచ్ మోర్నే మోర్కెల్‌తో సరదాగా కనిపించారు. ఆదివారం సోషల్ మీడియాలో ఒక వీడియో వైరల్ అయింది. ఇందులో మోర్నీ మోర్కెల్ అర్ష్‌దీప్ సింగ్, ఆకాష్ దీప్‌లతో WWE-స్టైల్‌లో కుస్తీ పడుతూ కనిపించారు.

అర్ష్‌దీప్ సింగ్, మోర్నే మోర్కెల్ WWE-స్టైల్‌లో ఎందుకు పోరాడుతున్నారు?
ఈ వీడియో వైరల్ అయిన తర్వాత బీసీసీఐ కూడా ఈ వీడియోను తమ సోషల్ మీడియా ఖాతాలో పోస్ట్ చేసింది. బీసీసీఐ పోస్ట్ చేసిన ఈ వీడియోలో అర్ష్‌దీప్ సింగ్‌తో పాటు ఈ ముగ్గురూ WWE-స్టైల్‌లో ఎందుకు కుస్తీ పడుతున్నారో వెల్లడించారు. బౌలింగ్ కోచ్ మోర్నే మోర్కెల్ ప్రాక్టీస్ సెషన్‌ను ముగించడానికి ఇది ఒక కొత్త మార్గమని అర్ష్‌‌దీప్ సింగ్ వెల్లడించారు. మోర్నే మోర్కెల్ ప్రతి రోజు ప్రాక్టీస్ సెషన్ ముగియగానే, తాను వారిని 'పిన్ అవుట్' చేస్తానని, ఆ తర్వాత ఇంక ప్రాక్టీస్ ఉండదని చెప్పాడని అర్ష్‌దీప్ సింగ్ వెల్లడించారు.

అర్ష్‌దీప్ సింగ్‌ అరంగేట్రం చేసే అవకాశం!
అర్ష్‌దీప్ సింగ్‌, ఆకాష్ దీప్‌లు నెట్స్‌లో బౌలింగ్ చేస్తూ కనిపించారు. ఇది ఇంగ్లాండ్‌తో జరిగే రెండో టెస్టులో పేస్ బౌలింగ్ విభాగంలో మార్పులు ఉండవచ్చని సూచిస్తోంది. అర్ష్‌దీప్ సింగ్‌‌కు ఎడ్జ్‌బాస్టన్ టెస్టులో అరంగేట్రం చేసే అవకాశం లభించవచ్చు. జస్ప్రీత్ బుమ్రాకు విశ్రాంతినిచ్చే అవకాశం ఉంది. బర్మింగ్‌హామ్‌లో సుదీర్ఘమైన, కఠినమైన శిక్షణా సెషన్‌లలో అర్ష్‌దీప్ సింగ్ చెమటోడ్చడం కనిపించింది. అర్ష్‌దీప్‌కు భారత్ టెస్ట్ క్యాప్ నంబర్ 318 లభించవచ్చు. అర్ష్‌దీప్‌ను ఎంపిక చేస్తే, సాయి సుదర్శన్ తర్వాత ఆండర్సన్-టెండూల్కర్ ట్రోఫీలో టెస్ట్ అరంగేట్రం చేసే రెండో భారత క్రికెటర్ అవుతాడు. అర్ష్‌దీప్ గతంలో ఇంగ్లాండ్‌లో కౌంటీ క్రికెట్ ఆడాడు. ఇది అర్ష్‌దీప్ సింగ్‌కు అక్కడి పరిస్థితులపై అనుభవాన్ని ఇస్తుంది.