ఆండ్రీ రస్సెల్ బర్త్‌డే స్పెషల్: మీకు తెలియని ఆసక్తికర విషయాలు!

Andre Russell Birthday : Interesting Facts About KKR All-Rounder || Oneindia Telugu

Andre Russell birthday: Interesting facts that will help you know the Kolkata Knight Riders all-rounder better

హైదరాబాద్: ఆండ్రీ రస్సెల్... ఐపీఎల్ 2019 సీజన్‌లో కోల్‌కతా నైట్‌రైడర్స్ విజయాల్లో కీలకపాత్ర పోషిస్తోన్న ప్రధాన ఆటగాడు. ఈ సీజన్‌లో కేకేఆర్ ఇప్పటివరకు ఆడిన పన్నెండు మ్యాచ్‌ల్లో ఐదింట విజయం సాధించి 10 పాయింట్లతో పట్టికలో ఆరో స్థానంలో కొనసాగుతోంది. అయితే, ఆదివారం ఈడెన్ గార్డెన్స్ వేదికగా ముంబై ఇండియన్స్‌తో జరిగిన మ్యాచ్‌లో విజయం సాధించి ప్లేఆఫ్ ఆశలను సజీవంగా ఉంచుకుంది.

ఐపీఎల్ 2019 రికార్డులు, గణాంకాలు, మ్యాచ్ స్కోరు వివరాల కోసం

కేకేఆర్ తన ప్లేఆఫ్ ఆశలను సజీవంగా ఉంచుకోవడంలో ఆండ్రీ రస్సెల్‌దే కీలకపాత్ర. ఆదివారం ముంబైతో జరిగిన మ్యాచ్‌లో రస్సెల్ 40 బంతుల్లో 80(6 ఫోర్లు, 8 సిక్సులు) జట్టు విజయం సాధించడంలో కీలకపాత్ర పోషించాడు. అంతేకాదు మ్యాన్ ఆఫ్ ద మ్యాచ్ అవార్డు కూడా అందుకున్నాడు. సోమవారం రస్సెల్ పుట్టినరోజు. ఈ సందర్భంగా అతడి గురించి కొన్ని ఆసక్తికర విషయాలు మీకోసం...

ఏప్రిల్ 29, 1988న కింగ్‌స్టన్‌లో జన్మించిన రస్సెల్

ఆండ్రీ రస్సెల్ జమైకాలోని కింగ్‌స్టన్‌లో ఏప్రిల్ 29, 1988లో జన్మించాడు. సోమవారం అతడు 31వ పుట్టినరోజుని జరుపుకుంటున్నాడు. ప్రస్తుతం రస్సెల్ వెస్టిండిస్ జాతీయ జట్టుతో పాటు ఇండియన్ ప్రీమియర్ లీగ్ (ఐపీఎల్)లో కోల్‌కతా నైట్ రైడర్స్ జట్టుకు ప్రాతినిథ్యం వహిస్తున్నాడు.

టెస్టు క్రికెట్ ద్వారా అరంగేట్రం

ప్రపంచ క్రికెట్‌లోకి టెస్టుల ద్వారా ఆండ్రీ రస్సెల్ అరంగేట్రం చేశాడు. తన తొలి టెస్టు మ్యాచ్‌ని శ్రీలంకపై నవంబర్ 2010లో ఆడాడు. ఫాస్ట్ బౌలింగ్ ఆల్ రౌండర్‌గా ఈ మ్యాచ్‌లో చోటు దక్కించుకున్నాడు.

ఆండ్రీ రస్సెల్ వన్డే

2011 క్రికెట్ వరల్డ్ కప్‌లో ఐర్లాండ్‌తో జరిగిన మ్యాచ్‌లో ఆండ్రీ రస్సెల్ వన్డే అరంగేట్రం చేశాడు. మొహాలి వేదికగా జరిగిన ఈ మ్యాచ్‌లో ఆండ్రీ రస్సెల్ కేవలం 3 పరుగులే చేసి ఒక వికెట్ తీశాడు.

తొలుత ఢిల్లీ డేర్‌డెవిల్స్‌కు

ఐపీఎల్‌లో ఆండ్రీ రస్సెల్‌ను మొదట వేలంలో దక్కించుకున్న జట్టు ఢిల్లీ డేర్ డెవిల్స్(ప్రస్తుతం ఢిల్లీ క్యాపిటల్స్). 2012 ఐపీఎల్ సీజన్‌లో ఢిల్లీ అతడిని వేలంలో సొంతం చేసుకుంది.

2014 ఐపీఎల్ వేలంలో కేకేఆర్ కొనుగోలు

ఐపీఎల్ 2014 సీజన్ కోసం నిర్వహించిన వేలంలో కోల్‌కతా నైట్‌రైడర్స్ యాజమాన్యం ఆండ్రీ రస్సెల్‌ను రూ. 60 లక్షలకు సొంతం చేసుకుంది. అప్పటి నుంచి ఇప్పటివరకు రస్సెల్ కేకేఆర్ జట్టు తరుపునే ఆడుతున్నాడు.

40 బంతుల్లో సెంచరీ

కరేబియన్ ప్రీమియర్ లీగ్‌లో ఆగస్టు 16న ఆండ్రీ రస్సెల్ 42 బంతుల్లో సెంచరీ సాధించాడు. టీ20ల్లో అత్యంత వేగంగా నమోదైన సెంచరీ ఇది. ఆ తర్వాత 2018లో ఇదే టోర్నీలో రస్సెల్ 40 బంతుల్లో సెంచరీ సాధించి తన రికార్డుని తానే బద్దలు కొట్టాడు.

ఐపీఎల్ 2017 సీజన్‌కు దూరం

యాంటీ డోపింగ్ ఆరోపణలతో జనవరి 30, 2018న ఆండ్రీ రస్సెల్‌పై ఏడాది పాటు నిషేధం విధించారు. దీంతో ఐపీఎల్ 2017 సీజన్‌కు దూరమయ్యాడు.

50 సిక్సులు బాదిన రస్సెల్

ప్రస్తుతం జరుగుతున్న ఐపీఎల్ సీజన్‌లో అత్యధిక స్ట్రయిక్ రేట్ కలిగి ఉన్న ఆటగాడు ఆండ్రీ రస్సెల్. ఈ సీజన్‌లో ఇప్పటివరకు 11 మ్యాచ్‌లాడిన రస్సెల్ 207.89 స్ట్రయిక్ రేట్‌ని కలిగి ఉన్నాడు. అంతేకాదు ఇప్పటివరకు మొత్తం 50 సిక్సులు బాదాడు. ఆదివారం ముంబైతో జరిగిన మ్యాచ్‌లో రస్సెల్ 8 సిక్సులు బాదాడు.