సారీ చెప్పిన రైనా, నవ్వుకుంటూ మైదానాన్ని విడిచిపెట్టిన రాయుడు

హైదరాబాద్: సన్‌రైజర్స్‌తో జరిగిన మ్యాచ్‌లో చెన్నై సూపర్ కింగ్స్ బ్యాట్స్‌మెన్ అంబటి రాయుడు ఆకాశమే హద్దుగా చెలరేగాడు. సొంత మైదానంలో ఫోర్లు, సిక్సర్లతో విరుచుకుపడ్డాడు. 7.1 ఓవర్లలో 32 పరుగులకే రెండు వికెట్లు కోల్పోయిన దశలో క్రీజ్‌లోకి అడుగపెట్టిన రాయుడు.. సురేశ్ రైనాతో కలిసి మూడో వికెట్‌కు 59 బంతుల్లోనే 112 పరుగులు జోడించాడు. ఆరంభంలో వీరిద్దరూ ఆచితూచి ఆడటంతో 10 ఓవర్లలో చెన్నై రెండు వికెట్ల నష్టానికి 52 పరుగులు మాత్రమే సాధించింది.

తర్వాత రాయుడు, రైనా దూకుడు పెంచారు. వికెట్ పడకుండా ఆడేందుకు రైనా (43 బంతుల్లో 54 నాటౌట్) ప్రాధాన్యం ఇవ్వగా.. అంబటి రాయుడు 39 బంతుల్లో (79) 9ఫోర్లు, 4 సిక్సులతో భారీ షాట్లతో విరుచుకుపడ్డాడు. తన ఐపీఎల్‌ కెరీర్లో రెండో అత్యధిక వ్యక్తిగత స్కోరును నమోదు చేశాడు. రాయుడు దూకుడు చూస్తే సెంచరీ ఖాయం అనిపించింది.

కానీ అనూహ్యంగా రనౌట్ అయ్యాడు. కౌల్ బౌలింగ్‌లో అంబటి రాయుడు సింగిల్ తీశాడు. తర్వాత ఫీల్డర్ ఇచ్చిన బంతిని బౌలర్ సరిగా అందుకోకపోవడంతో.. రాయుడు పరుగు కోసం ముందుకొచ్చాడు. రైనా వారించడంతో తిరిగి వెనక్కి వెళ్లే ప్రయత్నం చేసినా అప్పటికే కౌల్ వికెట్లను గిరాటేశాడు.

అవనసర పరుగుకు యత్నించి ఔటైన రాయుడు నవ్వుతూ కనిపించగా.. రైనా మాత్రం బాధపడుతూ కనిపించాడు. పంజాబ్‌తో జరిగిన మ్యాచ్‌లోనూ రాయుడు 49 పరుగుల వద్ద ఇలాగే రనౌట్ అయ్యాడు. దీంతో మ్యాచ్ మలుపు తిరిగింది. చెన్నై ఓటమిపాలైంది. సన్‌రైజర్స్‌తో జరిగిన మ్యాచ్ విషయానికి వస్తే.. అంబటి అవుటయ్యాక క్రీజులోకి వచ్చిన ధోనీ (12 బంతుల్లో 25 నాటౌట్) మెరుపులు మెరిపించడంతో చెన్నై నిర్ణీత 20 ఓవర్లలో 182/3గా నిలిచింది.