గిల్ కాదు.. ఆ గుజరాత్ ఆటగాడికి అభిమానిగా మారిన అంబటి రాయుడు!

Ambati Rayudu: ఐపీఎల్ 2025లో తన అద్భుతమైన ఆటతో భారత మాజీ క్రికెటర్ అంబటి రాయుడిని ఆకట్టుకున్న వారిలో గుజరాత్ టైటాన్స్ ఆటగాడు సాయి సుదర్శన్ కూడా ఉన్నాడు. ఈడెన్ గార్డెన్స్‌లో డిఫెండింగ్ ఛాంపియన్స్ కోల్‌కతా నైట్ రైడర్స్‌పై మ్యాచ్ విన్నింగ్ హాఫ్ సెంచరీ చేసిన తర్వాత గుజరాత్ టైటాన్స్ ఓపెనర్ సాయి సుదర్శన్ ఈ సీజన్‌లో అత్యధిక పరుగులు చేసిన ఆటగాడిగా నిలిచాడు. సాయి సుదర్శన్ ఇప్పటివరకు 8 మ్యాచ్‌‌ల్లో 50 కంటే ఎక్కువ సగటుతో 417 పరుగులు చేసి ఆరెంజ్ క్యాప్‌ను గెలుచుకున్నాడు.

ప్రారంభంలో నెమ్మదిగా ఆడిన అనంతరం సుదీర్ఘ ఇన్నింగ్స్ ఆడి వేగంగా పరుగులు సాధించడంలో తనకు ఎంత కళ ఉందో సాయి సుదర్శన్ చూపించాడు. పరిస్థితులు ఏమైనప్పటికీ గ్యాప్‌లలో స్థిరంగా షాట్లు ఆడే సామర్థ్యంతో ఈ తమిళనాడు బ్యాటర్ అసాధారణంగా రాణించాడు. ఈ రోజుల్లో టీ20 క్రికెట్‌లో పవర్ ప్లే సమయంలో వేగంగా పరుగులు సాధించే ధోరణి ఉంది. కానీ సాయి సుదర్శన్ ప్రశాంతత, స్థిరమైన విధానం గుజరాత్ టైటాన్స్ కు చాలా లాభం జరిగిందని కూడా నిరూపించబడింది. తాజాగా ఇప్పుడు అంబటి రాయుడు సాయి సుదర్శన్ శైలికి అభిమానిగా మారాడు.

అంబటి రాయుడు ప్రశంసిస్తూ ఇలా అన్నాడు..
జియోస్టార్‌తో జరిగిన సంభాషణలో అంబటి రాయుడు మాట్లాడుతూ.. "సాయి సుదర్శన్ బ్యాటింగ్ చూడటం చాలా సంతోషంగా ఉంది. అతను క్లాసిక్ బ్యాటర్ లాగా ఆడుతాడు. క్రికెట్‌ను సాంప్రదాయ పద్ధతిలో ఆడవచ్చని, బంతి వేగాన్ని సరిగ్గా ఉపయోగించడం, షాట్లను నేలపై ఆడడం, తెలివిగా క్రికెట్ ఆడడం వంటివి చూపిస్తాడు. స్మార్ట్ క్రికెట్ ఆడినప్పుడు పరుగులు మాత్రమే కాకుండా ఆత్మవిశ్వాసం కూడా పెరుగుతుంది. డగౌట్ లో అంత ఆత్మవిశ్వాసం ఉన్నప్పుడు అది మొత్తం జట్టును కూడా ప్రభావితం చేస్తుంది. అందరు ఆటగాళ్లు ఒకే లయలో ఆడతారు. వారి నిర్ణయం తీసుకునే సామర్థ్యం, ఆలోచన కూడా మెరుగుపడుతుంది. ఈ సీజన్ లో సాయి సుదర్శన్ విషయంలో కూడా అదే చూస్తున్నాం."అని అంబటి రాయుడు అన్నాడు.

ఈ ఏడాది అద్భుతంగా రాణించిన సాయిసుదర్శన్
సాయి సుదర్శన్ స్ట్రైక్ రేట్ 152.19. ఇది ఐపీఎల్ 2025లో టాప్ స్కోరు బ్యాటర్లలో ఇదే అత్యల్పం. అయినప్పటికీ 8 మ్యాచ్‌ల్లో 400 కంటే ఎక్కువ పరుగులు చేసిన ఏకైక బ్యాటర్ సాయి సుదర్శన్. టీ20 క్రికెట్‌లో ఇంత క్రమబద్ధతతో పరుగులు సాధించడం ప్రశంసనీయం.