ఆల్‌రౌండర్ ఈజ్ బ్యాక్!: టీ20 వరల్డ్ కప్ ముందు భారత్‌కు గుడ్‌న్యూస్

Hardik Pandya: టీ20 ప్రపంచ కప్ 2026లో తమ టైటిల్‌ను కాపాడుకోవడానికి భారత్ సిద్ధమవుతోంది. ఈ మెగా టోర్నమెంట్‌కు సన్నద్ధమయ్యేందుకు మెన్ ఇన్ బ్లూ అనేక వైట్ బాల్ సిరీస్‌లకు సిద్ధమవుతున్నారు. అయితే ఆసియా కప్ 2025 సమయంలో హార్దిక్ పాండ్యా క్వాడ్రిసెప్స్ కండరాల గాయంతో జట్టుకు బిగ్ షాక్ తగిలింది. అప్పటి నుంచి హార్దిక్ పాండ్యా పాకిస్తాన్‌తో జరిగిన కీలక ఫైనల్‌తో పాటు ఆస్ట్రేలియా పర్యటనకు దూరమయ్యాడు. ఇప్పుడు టీమిండియాకు గుడ్ న్యూస్ వచ్చింది. హార్దిక్ పాండ్యా టీ20 ప్రపంచ కప్‌కు చాలా ముందుగానే తిరిగి రావడానికి సిద్ధమవుతున్నట్లు తెలుస్తోంది.

ఆసియా కప్ 2025 సెమీ-ఫైనల్లో శ్రీలంకతో జరిగిన మ్యాచ్ తర్వాత హార్దిక్ పాండ్యా తొలిసారిగా సయ్యద్ ముస్తాక్ అలీ ట్రోఫీలో బరోడా తరఫున ఆడనున్నాడు. ఈ దేశీయ టీ20 టోర్నమెంట్‌లో హార్దిక్ పాండ్యా మొదటి రెండు మ్యాచ్‌లకు అందుబాటులో ఉంటాడు. ఆ తర్వాత రాబోయే దక్షిణాఫ్రికాతో వన్డే, టీ20 సిరీస్‌లలో టీమిండియాలోకి తిరిగి వస్తాడు.

కోలుకుంటున్న హార్దిక్ పాండ్యా
హార్దిక్ పాండ్యా ప్రస్తుతం బెంగళూరులోని బీసీసీఐ సెంటర్ ఆఫ్ ఎక్సలెన్స్ (NCA)లో కోలుకుంటున్నాడు. నవంబర్ 26న బెంగాల్‌తో జరిగే సయ్యద్ ముస్తాక్ అలీ ట్రోఫీ ప్రారంభ మ్యాచ్‌కు హార్దిక్ ఫిట్‌గా ఉంటాడని ఓ నివేదిక పేర్కొంది. ఒకవేళ ఏమైనా ఆలస్యమైతే, నవంబర్ 28న పుదుచ్చేరితో జరిగే టోర్నమెంట్ రెండో మ్యాచ్ నాటికి ఈ స్టార్ ఆల్‌రౌండర్ ఖచ్చితంగా యాక్షన్‌లోకి తిరిగి వస్తాడు. గాయం నుంచి కోలుకున్న తర్వాత హార్దిక్ పాండ్యాకు ఎటువంటి విశ్రాంతి ఉండదు. బరోడా తమ అన్ని మ్యాచ్‌లను ఆడనున్న హైదరాబాద్‌కు పాండ్యా నేరుగా చేరుకుంటాడు.

హార్దిక్ పాండ్యా చివరగా ఆడిన ఆసియా కప్ 2025 టోర్నమెంట్ అతనికి అంతగా కలిసి రాలేదు. ఐదు మ్యాచ్‌లలో కేవలం 48 పరుగులు చేసి, 4 వికెట్లు మాత్రమే తీయగలిగాడు.