ఐపియల్ అన్నింటిపై విచారణ: ప్రణబ్

న్యూఢిల్లీ: ఇండియన్ ప్రీమియర్ లీగ్ (ఐపియల్)లోని అన్ని అంశాలపై విచారణ జరుపుతామని కేంద్ర ఆర్థిక మంత్రి ప్రణబ్ ముఖర్జీ చెప్పారు. కొచ్చి ఐపియల్ ఫ్రాంచైజీ వివాదంలో ఇరుక్కుని శశి థరూర్ మంత్రి పదవికి రాజీనామా చేసిన నేపథ్యంలో ప్రణబ్ ముఖర్జీ లోకసభలో ఓ ప్రకటన చేశారు. ఐపియల్ అక్రమాల్లో ఇరుక్కున్న ఎవరిని కూడా వదిలిపెట్టేది లేదని ఆయన స్ఫష్టం చేశారు.

కాగా, సోమవారం ఉదయం తిరువనంతపురం లోకసభ సభ్యుడు శశిథరూర్ ప్రణబ్ ముఖర్జీని కలుసుకున్నారు. వారిద్దరి మధ్య జరిగిన చర్చ ఏమిటనేది తెలియరాలేదు. పార్లమెంటు హౌస్ ఆవరణలో ఈ భేటీ జరిగింది. తన ప్రియురాలు సునంద పుష్కర్ కు ఉచితంగా కొచ్చి ఐపియల్ ఫ్రాంచైజీలో 70 కోట్ల రూపాయల వాటా ఇప్పించాడనే ఆరోపణలపై శశి థరూర్ తన మంత్రి పదవికి రాజీనామా చేశారు.