ఆ ఒక్క తప్పే మమ్మల్ని ముంచేసింది: అజింక్య రహానే

రాయ్‌పూర్ వేదికగా జరిగిన మ్యాచ్‌లో ఆర్సీబీ చేతిలో ఓటమి అనంతరం కేకేఆర్ కెప్టెన్ అజింక్య రహానే తన మనసులోని మాటలను పంచుకున్నాడు. రాయ్‌పూర్ పిచ్‌పై 192 పరుగుల లక్ష్యం అనేది చాలా మంచి స్కోరు అని రహానే అభిప్రాయపడ్డాడు. మ్యాచ్ ముగిసిన అనంతరం అక్కడక్కడా కొన్ని పరుగులు తక్కువయ్యాయని చెప్పుకోవడం సహజమేనని.. కానీ కేకేఆర్ బ్యాటర్లు చేసిన కృషి అభినందనీయమని రహానే పేర్కొన్నాడు. మధ్య ఓవర్లలో బ్యాటింగ్ చేసిన ఆటగాళ్లు కూడా ఈ స్కోరు ప్రత్యర్థికి గట్టి సవాలు విసురుతుందని భావించినట్లు రహానే తెలిపాడు.

ఓటమికి కారణం
ఈ మ్యాచ్‌లో తమ ఓటమికి ప్రధాన కారణం ఫీల్డింగ్ వైఫల్యాలేనని రహానే పరోక్షంగా అంగీకరించాడు. ముఖ్యంగా విరాట్ కోహ్లీ వంటి డేంజరస్ ప్లేయర్ క్యాచ్‌ను వదిలేయడం మ్యాచ్ ఫలితాన్ని మార్చేసిందని ఆవేదన వ్యక్తం చేశాడు. గత 3-4 మ్యాచ్‌లలో తమ జట్టు ఫీల్డింగ్ అద్భుతంగా ఉందని.. కానీ ఈ మ్యాచ్‌లో కీలక సమయంలో క్యాచ్‌లు చేజార్చడం దెబ్బతీసిందని చెప్పాడు. కొత్తగా వచ్చే బ్యాటర్‌కు ఈ పిచ్ అంత సులభం కాదని.. ఆ సమయంలో కోహ్లీని ఔట్ చేసి ఉంటే ఫలితం మరోలా ఉండేదని రహానే విశ్లేషించాడు.

కోహ్లీ - పడిక్కల్ భాగస్వామ్యం
ఆర్సీబీ విజయంలో విరాట్ కోహ్లీ, దేవదత్ పడిక్కల్ మధ్య నెలకొన్న భాగస్వామ్యం కీలక మలుపు అని రహానే కొనియాడాడు. "ఛేజింగ్‌లో విరాట్ ఎంత ప్రమాదకరమైన ఆటగాడో మనందరికీ తెలుసు. దానికి తోడు పడిక్కల్ కూడా ఈ టోర్నీలో అద్భుతమైన ఫామ్‌లో ఉన్నాడు. వీరిద్దరిని కట్టడి చేయడంలో మేము విఫలమయ్యాం" అని రహానే తెలిపాడు. పవర్‌ప్లేలో బ్యాటింగ్‌కు పిచ్ సహకరించినప్పటికీ.. మధ్య ఓవర్లలో తమ స్పిన్నర్లు వికెట్లు తీస్తారని ఆశించామని, కానీ ఆర్సీబీ బ్యాటర్లు ఆ అవకాశం ఇవ్వలేదని రహానే పేర్కొన్నాడు.

కార్తీక్ త్యాగి బౌలింగ్‌పై ప్రశంసలు
జట్టు ఓడిపోయినప్పటికీ.. యువ పేసర్ కార్తీక్ త్యాగి బౌలింగ్‌పై రహానే ప్రశంసలు కురిపించాడు. త్యాగి చాలా కష్టపడుతున్నాడని, మైదానంలో అతను బౌలింగ్ చేసేటప్పుడు ఉండే స్పష్టమైన ఆలోచనా విధానం తనకు ఎంతగానో నచ్చిందని చెప్పాడు. తన ప్రణాళికలను అమలు చేయడంలో త్యాగి చూపిస్తున్న పట్టుదల జట్టుకు శుభపరిణామమని రహానే వెల్లడించాడు. క్యాచ్‌లు జారిపోవడం సహజమని, ఆటగాళ్లు దానిపై మరింత శ్రద్ధ పెడతారని ఆయన ఆశాభావం వ్యక్తం చేశాడు.