మేమెప్పుడూ ఫిర్యాదు చేయలేదు
'అహ్మదాబాద్లోనే జరిగే నాలుగో టెస్టులో పిచ్.. చెన్నైలో ఆడిన స్పిన్ ట్రాక్ మాదిరే ఉండొచ్చు. గులాబి టెస్టులో బంతి ఎర్ర బంతితో పోలిస్తే చాలా వేగంగా బ్యాట్స్మెన్ వైపు దూసుకొచ్చింది. దీనికి తగ్గట్టుగా బ్యాటింగ్లో సర్దుబాట్లు చేసుకోవాలి. మేము విదేశాల్లో పర్యటించినప్పుడు పేస్ వికెట్ల గురించి అసలు చర్చే జరగదు. ఒకవేళ మంచి ప్రదర్శన చేయలేకపోతే.. బ్యాట్స్మెన్ టెక్నిక్ గురించే మాట్లాడుతారు. అలాంటిది మనదేశంలో మాత్రం వికెట్ గురించి చర్చ జరుగుతుంది. మాట్లాడేవాళ్లను మాట్లాడుకోనివ్వండి. వాటి గురించి మేం పట్టించుకోం' అని టెస్ట్ వైస్ కెప్టెన్ అజింక్య రహానే అన్నాడు.
ఆటకన్నా ఎక్కువ పిచ్ గురించే
'విదేశీ పర్యటనల్లో మాకు తొలిరోజే పచ్చికతో కూడిన సీమింగ్ వికెట్ దర్శనమిచ్చినా.. మేము ఏరోజు దాని గురించి మాట్లాడలేదు. అలాంటిది స్పిన్ వికెట్లపైకి వచ్చేసరికి ఆటకన్నా ఎక్కువ పిచ్ గురించే చర్చ జరుగుతుంది. మరీ అంత ఆలోచించాల్సిన అవసరం లేదు. బంతి స్పిన్ అవుతుంటే.. లైన్ను బట్టి బ్యాటింగ్ చేయాలి. ఫుట్వర్క్ను నమ్ముకుంటూ డిఫెన్స్పై ఆధారపడి ఇన్నింగ్స్ను నిర్మించాలి. కొత్త బ్యాట్స్మన్ క్రీజులోకి రాగానే అతడి సహచరుడు పిచ్ పరిస్థితుల గురించి వివరించాలి. స్పిన్ పిచ్లపై బ్యాటింగ్ సవాలుతో కూడుకున్నదే. నిలదొక్కుకుంటే పరుగులు చేయడం పెద్ద కష్టమేం కాదు' అని జింక్స్ పేర్కొన్నాడు.
ప్రపంచకప్తో సమానం
లార్డ్స్లో జరగనున్న ప్రపంచ టెస్టు చాంపియన్షిప్ ఫైనల్ గెలవడం తమకు ప్రపంచకప్తో సమానమని రహానే చెప్పాడు. 'ఇషాంత్ శర్మ చెప్పింది నిజం. మేము నాలుగో టెస్టు గెలవడంతో పాటు లార్డ్స్ వేదికగా జరగనున్న ప్రపంచ టెస్టు చాంపియన్షిప్ గెలవడం లక్ష్యంగా పెట్టుకున్నాం. టెస్టు చాంపియన్ విజయం మాకు ప్రపంచకప్తో సమానం. ఈ నేపథ్యంలో నాలుగో టెస్టులో విజయం సాధించడం చాలా అవసరం' అని కింక్స్ తెలిపాడు.
ఉమేశ్ అందుబాటులోకి రావడం సంతోషం
గత రెండు మ్యాచ్ల్లో ఇంగ్లండ్ ప్రదర్శన బాగుందని అజింక్య రహానే అన్నాడు. ఉమేశ్ యాదవ్ అందుబాటులోకి రావడం సంతోషమని చెప్పాడు. వ్యక్తిగత కారణాలతో స్టార్ పేసర్ జస్ప్రీత్ బుమ్రా నాలుగో టెస్టుకు దూరమయిన విషయం తెలిసిందే. ఇక ఇంగ్లండ్తో నాలుగు మ్యాచ్ల సిరీస్లో భాగంగా గురువారం నుంచి మొతెరాలో ఆఖరి మ్యాచ్ ప్రారంభం కానుండగా.. ప్రస్తుతం టీమిండియా 2-1తో ఆధిక్యంలో ఉంది. ఈ మ్యాచ్ను 'డ్రా' చేసుకున్నా భారత జట్టు ప్రపంచ టెస్టు చాంపియన్షిప్ ఫైనల్కు అర్హత సాధించనున్న విషయం తెలిసిందే.