అండర్ 19 వరల్డ్ కప్: 'వీడియో ఫుటేజీలు చూసే వాళ్లను ఓడించాం'

హైదరాబాద్ : అండర్-19 ప్రపంచకప్‌లో ఆస్ట్రేలియా ఆదివారం మ్యాచ్‌లో గెలిచి ఫైనల్ చేరింది. సంచలన ప్రదర్శనతో సెమీస్ చేరిన అప్ఘానిస్థాన్‌ను 6 వికెట్ల తేడాతో ఓడించింది. సెమీఫైనల్లో టాస్ గెలిచి ముందుగా బ్యాటింగ్ చేసిన అప్ఘాన్ జట్టు 48 ఓవర్లలో 181 పరుగులకు ఆలౌట్ అయ్యింది.

స్వల్ప లక్ష్యాన్ని ఆసీస్ 37.3 ఓవర్లలోనే చేధించింది. ఈ విజయంతో ఐదుసార్లు వరల్డ్ కప్ ఫైనల్ చేరిన ఆసీస్ పాకిస్థాన్ రికార్డ్‌‌ను సమం చేసింది. అప్ఘానిస్థాన్ తరఫున వన్‌డౌన్‌ బ్యాట్స్‌మెన్ ఇక్రమ్ అలీ ఖిల్ 80 పరుగులతో టాప్ స్కోరర్‌గా నిలిచాడు. మిగతా బ్యాట్స్‌మెన్ ఎవరూ చెప్పుకోదగ్గ స్కోరు చేయలేకపోయారు. అప్ఘాన్ జట్టు 181 పరుగులకే పరిమితమైంది.

ఆసీస్ బౌలర్ జొనాథన్ మెర్లో 4 వికెట్లు తీయగా, జాక్ ఎవాన్స్ రెండు వికెట్లు పడగొట్టాడు. స్వల్ప లక్ష్యంతో బరిలో దిగిన ఆసీస్‌ ఆరంభంలోనే ఓపెనర్ మ్యాక్స్ బ్రియాంట్ వికెట్‌ను కోల్పోయింది. కానీ మరో ఓపెనర్ జాక్ ఎడ్వర్డ్స్ (65 బంతుల్లో 72; 8x4, 2x6) ఎదురు దాడికి దిగాడు. దీంతో ఆసీస్ విజయం తేలికైంది.

ప్లేయర్ ఆఫ్ ది మ్యాచ్‌గా నిలిచిన జాక్ ఎడ్వర్డ్స్ మాట్లాడుతూ అప్ఘాన్ స్పిన్నర్ల బౌలింగ్‌పై పరిశోధన చేశామని చెప్పాడు. వీడియో ఫుటేజ్‌ను పరిశీలించడం ద్వారా వారు బౌలింగ్ ఎలా చేస్తున్నారో అవగాహనకు వచ్చామని తెలిపాడు. వారు మా మీద దాడి చేయడానికి ముందే ఎదురుదాడి చేసి సత్ఫలితం రాబట్టానని చెప్పాడు.

వీడియో ఫుటేజ్ లేకుంటే అప్ఘాన్ స్పిన్నర్లను ఎదుర్కోవడం కష్టమయ్యేదని చెప్పాడు. మొత్తానికి వీడియో ఫుటేజీ అప్ఘాన్‌కు తొలిసారి వరల్డ్ కప్ ఫైనల్ చేరే అవకాశాన్ని దూరం చేసింది.

తెలుగులో అన్ని క్రీడావార్తల కోసం 'మై-ఖేల్ తెలుగు'ను ఫేస్‌బుక్, ట్విటర్ , గూగుల్ ప్లస్‌లో ఫాలో అవ్వండి.