జంపా: అతి తక్కువ ఇన్నింగ్స్‌ల్లో 50 వికెట్లు తీసిన రెండో స్పిన్నర్

జంపాకు 38 ఇన్నింగ్స్‌లు అవసరం

50వ వికెట్‌ను తీసేందుకు ఆడమ్ జంపాకు 38 ఇన్నింగ్స్‌లు అవసరం కాగా, షేన్‌ వార్న్‌ 25 ఇన్నింగ్స్‌ల్లోనే ఈ ఘనత సాధించాడు. అతి తక్కువ మ్యాచ్‌ల్లో యాభై వికెట్లు సాధించిన ఆసీస్‌ స్పిన్నర్ల జాబితాలో షేన్ వార్న్‌ తర్వాత ఆడమ్ జంపా నిలిచాడు. ఆ తర్వాత స్థానంలో పీటర్‌ టేలర్‌(40 మ్యాచ్‌లు), నాథన్‌ హారిట్జ్‌(44 మ్యాచ్‌లు), బ్రాడ్‌ హాగ్‌(47)లు ఉన్నారు.

వన్డేల్లో అతి తక్కువ మ్యాచ్‌ల్లో 50 వికెట్లు తీసిన ఆసీస్ స్పిన్నర్లు:

25 - షేన్ వార్న్

38 - ఆడమ్ జంపా

40 - పీటర్ టేలర్

44 - నాథన్‌ హారిట్జ్‌

47 - బ్రాడ్‌ హాగ్‌

నాలుగో వన్డేలో భారత్ ఓటమి

కాగా, నాలుగో వన్డేలో భారత్‌ ఓటమి పాలైంది. మొహాలి వేదికగా ఆదివారం జరిగిన నాలుగో వన్డేలో 358 పరుగుల భారీ స్కోరు చేసినప్పటికీ.. పేలవ బౌలింగ్, ఫీల్డింగ్ కారణంగా టీమిండియా 4 వికెట్ల తేడాతో ఓటమిపాలైంది. 359 పరుగుల విజయ లక్ష్యంతో బరిలోకి దిగిన ఆసీస్ ఇంకా 13 బంతులు ఉండగానే లక్ష్యాన్ని ఛేదించింది.

ఐదు వన్డేల సిరీస్‌ 2-2తో సమం

ఐదు వన్డేల సిరీస్‌ 2-2తో సమం అయింది. సిరిస్ విజేత ఎవరో నిర్ణయించే ఐదో వన్డే ఢిల్లీ వేదికగా బుధవారం మధ్యాహ్నం 1.30 గంటల నుంచి జరగనుంది. ఆసీస్ ఆటగాడు టర్నర్ (84 నాటౌట్: 43 బంతుల్లో 5 ఫోర్లు, 6 సిక్సులు)‌కి మ్యాన్ ఆఫ్ ద మ్యాచ్ అవార్డు లభించింది.