రిటైర్మెంట్ ప్రకటించిన 8 ప్రపంచ కప్పుల విజేత

మహిళా క్రికెట్ ప్రపంచంలో ఓ అద్భుత అధ్యాయం ముగియనుంది. ఆస్ట్రేలియా మహిళా క్రికెట్ జట్టుకు వెన్నెముకగా నిలిచిన స్టార్ వికెట్ కీపర్, బ్యాటర్, ప్రస్తుత కెప్టెన్ అలిస్సా హీలీ అంతర్జాతీయ క్రికెట్‌కు రిటైర్మెంట్ ప్రకటించారు. ఈ ఏడాది మార్చిలో భారత్‌తో జరగనున్న స్వదేశీ సిరీస్ తర్వాత ఆమె ఆటకు వీడ్కోలు పలకనున్నారు.

భారత్‌తో ఆఖరి పోరు
35 ఏళ్ల హీలీ పెర్త్‌లో భారత్‌తో జరగనున్న మూడు వన్డేలు, ఏకైక టెస్ట్ మ్యాచ్‌లో ఆఖరిసారిగా ఆస్ట్రేలియాకు సారథ్యం వహించనున్నారు. అయితే ఈ ఏడాది బ్రిటన్‌లో జరగనున్న టీ20 ప్రపంచకప్ ఆడకూడదని నిర్ణయించుకున్నందున, భారత్‌తో జరిగే టీ20 సిరీస్‌కు ఆమె అందుబాటులో ఉండరు. స్వదేశీ మైదానంలో బలమైన భారత జట్టుపై ఆడుతూ కెరీర్‌ను ముగించడం తనకు దక్కిన గౌరవంగా ఆమె భావిస్తున్నారు.

మనసు విప్పిన హీలీ
తన రిటైర్మెంట్ నిర్ణయంపై హీలీ స్పందిస్తూ.. "దేశం కోసం ఆడాలనే తపన నాలో ఇంకా ఉంది. కానీ మైదానంలో గెలవాలనే ఆ తీవ్రమైన పోటీ తత్వం నాలో కొంచెం తగ్గినట్లు అనిపిస్తోంది. అందుకే ఆగిపోవడానికి ఇదే సరైన సమయమని నిర్ణయించుకున్నాను. గాయాలతో పోరాడుతూ వికెట్ల వెనుక డైవ్‌లు చేయడం ఇప్పుడు కొంచెం భారంగా మారుతోంది" అని నిజాయితీగా పేర్కొన్నారు.

రికార్డుల రారాణి - 8 ప్రపంచ కప్పుల యోధురాలు
గత దశాబ్ద కాలంగా ప్రపంచ మహిళా క్రికెట్‌లో ఆస్ట్రేలియా సాధించిన ఎదురులేని ఆధిపత్యంలో హీలీ కీలక పాత్ర పోషించారు. ఆమె తన కెరీర్‌లో ఏకంగా 8 ప్రపంచ కప్ టైటిళ్లను ముద్దాడారు (6 టీ20 ప్రపంచ కప్పులు, 2 వన్డే ప్రపంచ కప్పులు).

హీలీ అద్భుతమైన కెరీర్ గణాంకాలు:
*టెస్టులు: 10 మ్యాచ్‌లు - 489 పరుగులు (సగటు 30.56)

*వన్డేలు: 123 మ్యాచ్‌లు - 3563 పరుగులు (సగటు 35.98, 7 సెంచరీలు)

*టీ20లు: 162 మ్యాచ్‌లు - 3054 పరుగులు (సగటు 25.45, 1 సెంచరీ)

స్టార్ దంపతులు
హీలీ ఆస్ట్రేలియా స్టార్ ఫాస్ట్ బౌలర్ మిచెల్ స్టార్క్ భార్య అన్న సంగతి తెలిసిందే. ప్రపంచ క్రికెట్‌లో ఈ జంటకు ప్రత్యేక గుర్తింపు ఉంది. ఆమె రిటైర్మెంట్ గురించి క్రికెట్ ఆస్ట్రేలియా సీఈఓ టాడ్ గ్రీన్‌బర్గ్ స్పందిస్తూ.. "హీలీ క్రీడా ప్రపంచంలోని అత్యున్నత క్రీడాకారిణుల్లో ఒకరు. ఆమె రిటైర్మెంట్‌తో ఒక శకం ముగిసింది" అని కొనియాడారు.