39 బంతులు.. 1 పరుగు.. అభినందనలతో దద్దరిల్లిన స్టేడియం(వీడియో)!!

39 బంతులు.. 1 పరుగు:

సిడ్నీ వేదికగా న్యూజిలాండ్‌తో జరుగుతున్న చివరిదైన మూడో టెస్ట్ తొలి ఇన్నింగ్స్‌లో స్టీవ్‌ స్మిత్‌ సుదీర్ఘ ఇన్నింగ్స్‌ ఆడాడు. ఓపెనర్ డేవిడ్ వార్నర్ (45) ఔట్ అయిన అనంతరం సెకండ్‌ డౌన్‌లో స్మిత్ బ్యాటింగ్‌కు వచ్చాడు. క్రీజులో పాతుకుపోయిన స్మిత్‌.. తొలి పరుగు చేయడానికి 39 బంతులు ఆడాడు. అంతేకాదు 45 నిమిషాల తర్వాత పరుగు చేసాడు. కివీస్ బౌలర్లు కట్టుదిట్టమైన బంతులు వేసినా.. సమర్ధంగా ఎదుర్కొన్నాడు.

చప్పట్లతో అభినందనలు:

అన్ని బంతులు ఆడి సింగిల్‌ తీసిన స్మిత్‌ను ఆసీస్ అభిమానులు ఆకాశానికెత్తారు. సిడ్నీ స్టేడియంలోని అభిమానులు లేచి మరీ స్మిత్‌ను చప్పట్లతో అభినందించారు. ఒక బ్యాట్స్‌మన్‌ సెంచరీ చేసిన తర్వాత అభిమానుల అభినందించడం సాధారణం. కానీ ఇక్కడ ఆసీస్‌ అభిమానులు మాత్రం పరుగు తీసిన తర్వాత అతన్ని చప్పట్లతో అభినందించడం విశేషం. సింగిల్ కోసం 39 బంతులు ఆడిన స్మిత్.. 143 బంతుల్లో హాఫ్ సెంచరీ సాధించాడు.

2020లో తొలి టెస్టు సెంచరీ:

మార్కస్‌ లబూషేన్‌తో కలిసి స్మిత్ 100కి పైగా పరుగుల భాగస్వామ్యాన్ని కూడా నెలకొల్పాడు. అయితే 63 పరుగుల వద్ద డి గ్రాండ్‌హోమ్ బౌలింగ్‌లో పెవిలియన్ చేరాడు. మరోవైపు లబూషేన్‌ ఈ ఏడాదిని కూడా ఘనంగా ఆరంభించాడు. తొలి రోజు ఆటలో లబూషేన్‌ శతకంతో మెరిశాడు. ఫలితంగా 2020లో తొలి టెస్టు సెంచరీ సాధించిన ఆటగాడిగా నిలిచాడు. మొత్తంగా తన కెరీర్‌లో 13 టెస్టులు ఆడిన లబూషేన్‌ 4 సెంచరీలు, 6 హాఫ్‌ సెంచరీలు సాధించాడు.

ఆసీస్‌ భారీ స్కోరు:

ఆసీస్‌ టాస్‌ గెలిచి బ్యాటింగ్‌ ఎంచుకుంది. బర్న్స్‌ (18) నిరాశపరచగా.. వార్నర్‌ మాత్రం రాణించాడు. ఈ ఇద్దరి అనంతరం లబూషేన్‌-స్టీవ్‌ స్మిత్‌ల జోడి ఇన్నింగ్స్‌ను నడిపించింది. ఒకవైపు స్మిత్‌ హాఫ్‌ సెంచరీ సాధించగా.. లబూషేన్‌ సెంచరీ సాధించాడు. ఈ టెస్టులో ఆసీస్‌ భారీ స్కోరు దిశగా పయనిస్తోంది. తొలిరోజు ముగిసే సరికి ఆసీస్ మూడు వికెట్లు కోల్పోయి 283 పరుగులు చేసింది. క్రీజులో లబూషేన్‌ (130), వేడ్ (22) ఉన్నారు.