భారత్ 1-0: విశాఖ టెస్టులో ఐదో రోజు ఆట సాగిందిలా

By Nageshwara Rao

Published: Monday, November 13, 2017, 12:13 [IST]

విశాఖపట్నం: భారత్-ఇంగ్లాండ్ జట్ల మధ్య విశాఖపట్నం వేదికగా జరిగిన రెండో టెస్టులో ఇంగ్లాండ్‌పై 247 భారత్ పరుగుల తేడాతో ఘన విజయం సాధించింది. విశాఖలోని ఏసీఏ-వీడీసీఏ స్టేడియంలో భారత బౌలర్లు చెలరేగిపోయారు. ఇంగ్లాండ్ బ్యాటింగ్ లైనప్‌ను భారత స్పిన్నర్లు కుప్పకూల్చారు.

భారత్ Vs ఇంగ్లాండ్ రెండో టెస్టు ఫోటోలు

ఈ విజయంతో ఐదు మ్యాచ్‌ల సిరీస్‌లో 1-0తో భారత్ ముందంజలో ఉంది. రెండో ఇన్నింగ్స్‌లో ఇంగ్లాండ్ 158 పరుగులకే ఆలౌటైంది. ఇంగ్లాండ్ జట్టులో ఆరుగురు బ్యాట్స్‌మెన్లు సింగిల్ డిజిట్‌కే పరిమితమయ్యారు. భారత బౌలర్లలో అశ్విన్, యాదవ్‌లు చెరో మూడు వికెట్లు తీసుకోగా, జడేజా, షమీ తలో రెండు వికెట్లు తీసుకున్నారు.

ఐదో రోజు ఆట సాగిందిలా:

87/2 ఓవర్ నైట్ స్కోరుతో సోమవారం రెండో ఇన్నింగ్స్ కొనసాగించిన ఇంగ్లాండ్ మరో 71 పరుగులు మాత్రమే జత చేసి ఆలౌటైంది. ఐదో రోజు భారత స్పిన్నర్ల దెబ్బకు ఇంగ్లాండ్ విలవిలలాడింది. లంచ్ సమయానికి ఏడు వికెట్లను కోల్పోయిన ఇంగ్లాండ్ ఆ తర్వాత అరగంట వ్యవధిలో ఇంగ్లాండ్ మిగతా మూడు వికెట్లను కోల్పోయి ఓటమి పాలైంది.

ఆట ప్రారంభం నుంచే వికెట్ల పతనం

చివరిరోజైన సోమవారం ఆట ప్రారంభం నుంచే ఇంగ్లాండ్ వికెట్ల పతనం కొనసాగింది. ఏ ఒక్క బ్యాట్స్మెన్ కూడా క్రీజులో కుదరుకునే ప్రయత్నం చేయలేదు. రెండో టెస్టు రెండో ఇన్నింగ్స్‌ నాలుగో రోజు ఆటలో ఇంగ్లాండ్ పోరాటం కనబడితే, చివరి రోజు మాత్రం అందుకు భిన్నంగా సాగింది.

38 ఓవర్లు ఆడి మిగతా 8 వికెట్లు కోల్పోయిన ఇంగ్లాండ్

ఆదివారం దాదాపు 60 ఓవర్ల పాటు ఆడి రెండు వికెట్లను కోల్పోయిన ఇంగ్లాండ్ జట్టు సోమవారం మాత్రం 38 ఓవర్లు ఆడి మిగతా 8 వికెట్లను కోల్పోయి ఓటమి పాలైంది. తన అరంగేట్రం టెస్టులోనే భారత స్పిన్నర్ జయంత్ యాదవ్ ఆకట్టుకున్నాడు. తొలి ఇన్నింగ్స్ లో 35 పరుగులు చేయడంతో పాటు, వికెట్ తీసిన జయంత్ ఫీల్డింగ్‌లో కూడా రాణించాడు.

అదరగొట్టిన జయంత్ యాదవ్

ఇక రెండో ఇన్నింగ్స్‌లో భారత స్కోరు 200 దాటడంలో ముఖ్య భూమిక పోషించిన జయంత్ యాదవ్ చివరి వరకూ క్రీజులో నిలబడి 27 పరుగులు చేశాడు. ఇక బౌలింగ్ విషయానికి వస్తే 11.3 ఓవర్లు పాటు బౌలింగ్ వేసి మూడు వికెట్లు తీసుకున్నాడు. ఇందులో నాలుగు మెడిన్ ఓవర్లు ఉండటం విశేషం.