సుప్రీం తీర్పు ఎఫెక్ట్: చేతులు కలిపిన శ్రీని, ఠాకూర్

లోధా సిఫారసులు మింగుపడటం లేదు

దీంతో పాటు వరుసగా రెండు సార్లు వర్కింగ్ కమిటీలో ఉండే, ఒక టెర్మ్ పోటీలకు దూరంగా ఉండాలని పేర్కొంటూ, ఆ కాలాన్ని కూలింగ్ పీరియడ్‌గా అభివర్ణించింది. మంత్రులెవరూ బోర్డులో కీలక పదవుల్లో ఉండరాదని లోధా కమిటీ స్పష్టం చేసింది. ఈ మూడు అంశాలను అమలు చేసేందుకు బీసీసీఐ అంగీకరించడం లేదు. దీంతో చివరకు ఈ కేసు సుప్రీం కోర్టుకు చేరుకోవడంతో సుమారు రెండేళ్లపాటు విచారణ జరిపి చివరకు బోర్డు అధ్యక్షుడు అనురాగ్ ఠాకూర్, కార్యదర్శి అజయ్ షిర్కేసహా కొంత మంది కీలక అధికారులను తప్పిస్తూ సుప్రీం కోర్టు తీర్పు వెల్లడించింది.

మాజీలంతా కలిసి ఓ సమావేశం

దీంతో భారత క్రికెట్‌పై తమ పట్టును సాధించేందుకు మాజీలంతా కలిసి ఓ సమావేశాన్ని ఏర్పాటు చేసుకున్నారు. ఈ సమావేశంలో బీసీసీఐపై తమ పట్టును కోల్పోకుండా తన ఆధిపత్యాన్ని కొనసాగించేందుకు చివరి అస్త్రాన్ని ప్రయోగించడానికి సిద్ధమయ్యారు. తమ ఆధీనంలో ఉన్న స్టేడియాలను మ్యాచ్‌లకు ఇచ్చేది లేది అనుబంధ యూనిట్లతో హెచ్చరికలు జారీ చేయించే పనిలో పడ్డారు. దేశంలోని దాదాపుగా అన్ని క్రికెట్ స్టేడియాలను బీసీసీఐ సహాయ సహకారాలతో ఆయా రాష్ట్రాల క్రికెట్ సంఘాలు నిర్మించాయి.

రాష్ట్రాల సంఘాలదీ అదే మాట

వీటిలో కొన్నింటిని నేరుగా బీసీసీఐ పర్యవేక్షిస్తున్నది. మరోవైపు స్టేడియాల నిర్వాహణ బాధ్యతలను కూడా ఆయా క్రికెట్ సంఘాలే చూసుకుంటున్నాయి. ఇప్పటివరకు ప్రభుత్వం నుంచి బీసీసీఐ ఒక్క రూపాయి కూడా ఆర్థిక సాయం పొందలేదు. తమది స్వతంత్ర ప్రతిపత్తిగల సంస్థ అంటూ బీసీసీఐ అధికారులు ఇన్నాళ్లూ చేస్తున్న వాదనను ఇకపై రాష్ట్రాల క్రికెట్ సంఘాలు వినిపించనున్నాయి. స్టేడియాలు రాష్ట్ర సంఘాల ఆధీనంలో ఉంటాయి కాబట్టి, వాటిని బీసీసీఐ నిర్వహించే మ్యాచ్‌లకు ఇవ్వబోమని స్పష్టం చేయనున్నాయి.

అడ్డుకునేందుకు కీలక నిర్ణయాలు

శనివారం శ్రీనివాసన్ నేతృత్వంలో జరిగిన సమావేశంలో ఇటువంటి పలు కీలక నిర్ణయాలను తీసుకున్నట్లుగా తెలుస్తోంది. అందుకే, స్టేడియాలను మ్యాచ్‌లకు ఇవ్వబోమన్న కొత్త ఎత్తుగడతో ముందుకు వెళ్లాలని అనుకుంటున్నట్టు సమాచారం. బోర్డు మాజీ అధికారులు, సుప్రీం కోర్టు ఆదేశాల కారణంగా పదవిని కోల్పోయిన వారు ఇప్పుడు ఒకే జట్టుగా ఏర్పడుతున్నారు. లోధా కమిటీ సిఫార్సులను అమలు చేస్తే తమకు పుట్టగతులు ఉండవు కాబట్టి, అలాంటి పరిస్థితి రాకుండా అడ్డుకునేందుకు అన్ని రకాలుగా ప్రయత్నాలు చేస్తున్నారు.