జ్వాల - అశ్విని సంచలన విజయం, చరిత్ర

లండన్: ఆంధ్రప్రదేశ్ బ్యాడ్మింటన్ క్రీడాకారిణి గుత్తా జ్వాల సంచలన విజయం సాధించింది. తద్వారా చరిత్ర సృష్టించిదంి. తన భాగస్వామి అశ్విని పొన్నప్పతో కలిసి ప్రపంచ బ్యాడ్మింటన్ చాంపియన్‌షిప్‌ మహిళా డబుల్స్‌లో సెమీఫైనల్లోకి దూసుకెళ్లింది. తద్వారా ఈ ప్రతిష్టాత్మక పోటీల్లో పతకం ఖాయం చేసుకున్న తొలి భారతీయ జంటగా గుర్తింపు పొందింది. 1983లో ప్రకాశ్ పదుకొనే పురుషుల సింగిల్స్‌లో కాంస్య పతకం సాధించాడు. ఆ తర్వాత భారత్ తరపున ఎవ్వరూ కనీసం సెమీఫైనల్లోకి చేరుకోలేకపోయారు. 28 ఏళ్ల తర్వాత జ్వాల, అశ్విని సెమీఫైనల్లోకి ప్రవేశించి భారత గౌరవాన్ని ఇనుమడింపజేశారు. ప్రపంచ చాంపియన్‌షిప్‌లో సెమీఫైనల్లో ఓడిన వారికి కాంస్య పతకాలు ఇస్తారు. శనివారం జరిగే మహిళల డబుల్స్ సెమీఫైనల్లో ప్రపంచ ఏడో ర్యాంక్ జావో లీ-తియాన్ కింగ్ (చైనా)లతో జ్వాల-అశ్విని ఢీకొంటారు.

ఈ టోర్నీలో ఎలాంటి అంచనాలు లేకుండా బరిలోకి దిగిన జ్వాల-అశ్విని జోడి తమ అద్వితీయ ప్రదర్శన కొనసాగించింది. శుక్రవారం జరిగిన మహిళల డబుల్స్ క్వార్టర్ ఫైనల్లో అన్‌సీడెడ్ జ్వాల-అశ్విని 17-21, 21-10, 21-17తో ప్రపంచ 15వ ర్యాంక్ వితా మరీస్సా-నాద్యా మెలాతి (ఇండోనేసియా) జోడిని ఓడించారు. స్మాష్‌ల ద్వారా 16 పాయింట్లు నెగ్గిన జ్వాల-అశ్విని నెట్‌వద్ద నాలుగు పాయింట్లు గెల్చుకున్నారు. గురువారం జరిగిన ప్రిక్వార్టర్ ఫైనల్లో జ్వాల-అశ్విని 19-21, 21-17, 21-19తో ప్రపంచ 12వ ర్యాంక్ పూన్ యాన్ లోక్-త్సె సుయెట్ యింగ్ (హాంకాంగ్) జంటను బోల్తా కొట్టించారు.