క్వార్టర్ ఫైనల్లోకి సైనా నెహ్వాల్: సాయి ప్రణీత్ ఔట్

బ్యాంకాక్: థాయిలాండ్ గ్రాండ్ ప్రీ బ్యాడ్మింటన్ టోర్నీ మహిళా సింగిల్స్ విభాగంలో భారత క్రీడాకారిణి సైనా నెహ్వాల్ క్వార్టర్ ఫైనల్లోకి దూసుకెళ్లింది. భారత్‌కు చెందిన హెచ్ఎస్ ప్రణయ్, కె. శ్రీకాంత్ కూడా క్వార్టర్ ఫైనల్లోకి చేరుకున్నారు. గురువారం జరిగిన ప్రీ క్వార్టర్ ఫైనల్లో టాప్ సీడ్ సైనా నెహ్వాల్ ఇండోనేషియాకు చెందిన ఫెబ్బీ అంగునిని 21-12, 21-12 స్కోరుతో కేవలం అర గంటలో మట్టి కరిపించింది. క్వార్టర్ పైనల్లో సైనా సింగపూర్‌కు చెందిన జాన్ గుతో తలపడుతుంది.

ఇదిలావుంటే, తెలుగుతేజం సాయి ప్రణీత్ థాయిలాండ్ ఓపెన్‌లో క్వార్టర్ ఫైనల్‌కు చేరుకోవడంలో విఫలమయ్యాడు. సంచనల విజయాలతో ప్రీ క్వార్టర్ ఫైనల్‌కు చేరుకున్న ఆ తర్వాత ముందడుగు వేయలేకపోయాడు. ప్రీక్వార్టర్ పైనల్లో సాయి ప్రణీత్ ఇండోనేషియాకు చెందిన విస్ను యులి ప్రసెత్యో చేతిలో 18-21, 21 -16, 19-21 స్కోరుతో పోరాడి ఓడిపోయాడు.

అంతకు ముందు సైనా నెహ్వాల్, యువ క్రీడాకారిణి అరుంధతి ముందంజ వేశారు. తమ తమ ప్రత్యర్థులను ఓడించి ప్రీ-క్వార్టర్ ఫైనల్స్ చేరారు. హైదరాబాద్‌కు చెందిన 23 ఏళ్ల డిఫెండింగ్ చాంపియన్ సైనా 21-11, 21-16 ఆధిక్యంతో చైనీస్ తైపీ క్రీడాకారిణి షిన్ హాన్ సంగ్‌ను ఓడించింది. ఈ మ్యాచ్ కేవలం 29 నిమిషాల్లో ముగియడం విశేషం.

నాగపూర్ నుంచి భారత టాప్ క్రీడాకారిణిగా ఎదిగిన అరుంధతి 14-21, 21-9, 21-15 తేడాతో కొరియాకు చెందిన మిన్ జీ లీపై విజయం సాధించింది. అయితే, మరో భారత క్రీడాకారిణి తులసీ ఓటమిపాలై టోర్నీ నుంచి నిష్క్రమించింది. మూడోసీడ్ పొర్న్‌టిప్ బరనప్రసెర్సుక్ 21-14, 21-17 స్కోరుతో తులసీపై గెలుపొందింది.