రెండడుగుల దూరంలో మరోసారి: సైనాకి ఇంటనోన్ షాక్

బర్మింగ్‌హామ్: కెరీర్‌‌లో తొలి ఆల్ ఇంగ్లాండ్ ఓపెన్ బ్యాడ్మింటన్ ఛాంపియన్‌షిప్ సొంతం చేసుకోవాలన్న సైనా నెహ్వాల్ కల ఫలించలేదు! క్వార్టర్స్‌‍లో చైనా అడ్డుగోడ, ఆరో సీడ్ షిజియాన్ వాంగ్‌ను మట్టికరిపించిన సైనా నెహ్వాల్ సెమీస్‌లో ఓటమి చవి చూసింది. ప్రపంచ నెంబర్ వన్ జ్యురుయ్ లీ, మూడో సీడ్ యిహాన్ వాంగ్ తొలిరౌండ్లోనే మట్టికరిచారు. ఆరోసీడ్ షిజియాన్ వాంగ్ రూపంలో మిగిలివున్న ఏకైక చైనా గండాన్ని సైనా అధిగమించింది.

చైనా అడ్డుగోడలు తొలగిపోవడంతో ఆల్ ఇంగ్లాండ్ ఓపెన్ ఛాంపియన్ షిప్ సైనాదేనని అందరూ భావించారు. కానీ, సైనా నెహ్వాల్ సెమీస్‌లో ఓడింది. దీంతో ఈ టైటిల్ కోసం మరో ఏడాది ఎదురు చూడాల్సిన పరిస్థితి వచ్చింది. ఈ టోర్నీలో సైనా మరోసారి టైటిల్‌కు రెండడుగుల దూరంలో అనూహ్యంగా నిష్క్రమించింది. ఇంటనోన్ చేతిలో మరోసారీ సైనా ఓడిపోయింది.

శనివారం జరిగిన మహిళల సింగిల్స్ సెమీస్‌లో ఏకైక భారత ఆశాకిరణం, రెండో సీడ్ సైనా 15-21, 19-21 స్కోరుతో ఎనిమిదో సీడ్ ఇంటనోన్ రట్చనోక్ (థాయ్‌లాండ్) చేతిలో ఓడిపోయింది. 40 నిమిషాల పాటు సాగిన పోరులో వరుస గేమ్‌ల్లో మ్యాచ్‌ను ప్రత్యర్థికి సమర్పించింది. ఇంటనోన్ చేతిలో సైనా చిత్తవడమిది మూడోసారి. మ్యాచ్‌లో తొలిపాయింట్ సాధించిన సైనా 10-6తో ముందంజ వేసింది.

కాగా ఈ దశలో వరుసగా ఆరు పాయింట్లు నెగ్గిన ఇంటనోన్ 12-10 ఆధిక్యంలోకి దూసుకెళ్లింది. చివర్లో వరుసగా ఐదు పాయింట్లు సంపాదించి 21-15తో తొలిగేమ్‌ను సొంతం చేసుకుంది. ఇక రెండో గేమ్‌లో సైనా 5-3 ఆధిక్యంలో నిలిచినా ఆనక ప్రత్యర్థిని అడ్డుకోలేకపోయింది. 8-5తో ముందంజ వేసిన ఇంటనోన్ ఏ దశలోనూ సైనాకు అందలేదు. ఆధిపత్యంతో కొనసాగిస్తూ మ్యాచ్‌ను ముగించింది. ఏదేమైనా ఇంగ్లండ్ ఓపెన్‌లో భారత్ పోరాటం ముగిసింది.