క్వార్టర్ ఫైనల్లో సైనా: సాయి ప్రణీత్ సంచలనాలకు తెర

జకర్తా: ఇండోనేసియా ఓపెన్ సూపర్ సిరీస్‌లో భారత ఏస్ షట్లర్ సైనా నెహ్వాల్, వర్ధమాన ఆటగాడు గురుసాయి దత్ క్వార్టర్స్‌లోకి ప్రవేశించారు. మరో భారత ఆటగాడు అజయ్ జయరామ్ కూడా క్వార్టర్ ఫైనల్‌కు చేరుకున్నాడు. అయితే, సాయి ప్రణీత్ సంచలనాలకు తెరపడింది.

ఒలింపిక్ చాంపియన్ తౌఫిక్ హిదాయత్‌ను మట్టికరిపించి సంచలనం సృష్టించిన తెలుగుతేజం సాయి ప్రణీత్ రెండో రౌండ్‌లో వెనుదిరిగాడు. వరల్డ్ నెంబర్ వన్ చోంగ్ వీ లీ (మలేసియా) చేతిలో 18-21, 12-21తో ఓటమి చవిచూశాడు.

సౌరభ్ వర్మ, డబుల్స్‌లో అశ్వినీ జోడీల పోరాటం ముగిసింది. గురువారం జరిగిన మహిళల సింగిల్స్ రెండో రౌండ్లో డిఫెండింగ్ చాంపియన్, వరల్డ్ నెంబర్ టూ సైనా 21-13, 21-19తో జపాన్ షట్లర్ సయాక టకహషిపై అలవోకగా నెగ్గింది.

పురుషుల సింగిల్స్ రెండో రౌండ్లో ఆంధ్రప్రదేశ్ ఆటగాడు గురుసాయిదత్ 21-12, 9-21, 21-19తో కజుమస సకాయ్ (జపాన్)పై దాదాపు గంట సేపు పోరాడి గెలిచాడు. మరో మ్యాచ్‌లో అజయ్ జయరామ్ 22-20, 21-12తో స్థానిక షట్లర్ సోనీ డ్విపై నెగ్గాడు.

మిక్స్‌డ్ డబుల్స్‌లో తరుణ్ కోనతో జతకట్టిన అశ్విని 14-21, 21-17, 13-21తో పోలాండ్ జోడీ రాబర్ట్, నడియెజ్డా చేతిలో మహిళల విభాగంలో ప్రద్న్య గాద్రెతో కలసి 13-21, 19-21తో స్థానిక ద్వయం అన్నెకె, డెల్లా చేతిలో ఓటమి చవిచూసింది.