ఐబిఎల్‌లో జ్వాలా గుత్తా ప్రవర్తన: బాయ్ విచారణ

న్యూఢిల్లీ: ఇండియన్ బ్యాడ్మింటన్ లీగ్(ఐబిఎల్) సందర్భంగా బంగా బీట్స్‌తో మ్యాచులో ఆడొద్దంటూ తన ఢిల్లీ స్మాషర్స్ సహచరులను జ్వాలా గుత్తా రెచ్చగొట్టిందనే ఆరోపణలపై భారత బ్యాడ్మింటన్ సంఘం(బాయ్) విచారణ జరపనుంది. ఆమెకు బాయ్ షోకాజ్ నోటీసులు జారీ చేసింది.

ఇటీవల ముగిసిన ఇండియన్ బ్యాడ్మింటన్ లీగ్ సందర్భంగా క్రిష్ ఢిల్లీ స్మాషర్స్ తరఫున గుత్తా జ్వాల సారథిగా వ్యవహరించారు. ఈ సమయంలో ఆమె బంగా బీట్స్‌తో జరిగిన మ్యాచ్‌లో ఆడరాదంటూ తమ జట్టు క్రీడాకారులు కొందరిని జ్వాల రెచ్చగొట్టినట్టు ఆరోపణలు వచ్చాయి.

గత నెల 25న జరిగిన ఈ మ్యాచ్‌లో ఆటగాడిని మార్చే విషయంలో వివాదం నెలకొంది. బంగా బీట్స్ షట్లర్ హు యున్ గాయపడటంతో అతని స్థానంలో జోర్గెన్‌సెన్‌ను బరిలోకి దించేందుకు ఐబిఎల్ గవర్నింగ్ కౌన్సిల్ అనుమతిచ్చింది. ఈ మార్పును ఢిల్లీ షట్లర్లు వ్యతిరేకిస్తూ మ్యాచ్ ఆడబోమని హెచ్చరించారు.

దీంతో బంగా జోర్గెన్‌సెన్‌ను ఆడించకుండా అరవింద్ భట్‌ను బరిలోకి దింపింది. ఈ విషయంపై జ్వాలకు ఇదివరకే షోకాజ్ నోటీసు పంపారు. 14 రోజుల్లోగా సమాధానమివ్వాలని జ్వాలకు గడువు విధించినట్టు బాయ్ ప్రతినిధి ఒకరు చెప్పారు.