ఇండోనేషియా ఓపెన్: సైనా సంచలనం

న్యూఢిల్లీ: ఇండోనేషియా సూపర్‌ సిరీస్‌ మహిళల బాడ్మింటన్ సింగిల్స్‌ టైటిల్‌ ను హైదరాబాద్ క్రీడాకారిణి సైనా నెహ్వాల్‌ సొంతం చేసుకుంది. ఆదివారం హోరాహోరీగా సాగిన ఫైనల్లో ప్రపంచ ఎనిమిదో నంబర్‌ క్రీడాకారిణి సైనా 12-21, 21-18, 21-9తో చైనాకు చెందిన ప్రపంచ మూడో ర్యాంకు లిన్‌ వాంగ్‌ పై అద్భుత విజయం సాధించింది. ఈ టోర్నీ నెగ్గిన తొలి భారతీయురాలు సైనానే. గత వారం లిన్‌ వాంగ్‌ చేతిలో ఓటమి పాలై సింగపూర్‌ ఓపెన్‌ నుంచి నిష్క్రమించిన సైనా మ్యాచ్‌ ఆరంభంలో తడబడింది.

అద్భుతమైన స్మాష్‌లతో సైనాను ఆటాడించిన వాంగ్‌ 9-4తో ఆధిక్యంలోకి దూసుకెళ్లింది. అదే వూపులో తొలి గేమ్‌ను కైవసం చేసుకుంది. ఐతే సైనా పుంజుకోవడంతో రెండో గేమ్‌ హోరాహోరీగా సాగింది. 5- 5.. 17-17.. ఇలా ఇద్దరి స్కోర్లూ సమమవుతూ వచ్చాయి. ప్రత్యర్థిని 18 స్కోరు వద్ద కట్టడి చేసిన సైనా గేమ్‌పాయింట్‌ సాధించి సెట్‌ను సొంతం చేసుకుంది. నిర్ణయాత్మక మూడో సెట్‌ ఆరంభంలో ఇద్దరూ నువ్వానేనా అన్నట్లు తలపడ్డారు. స్కోరు 7-7తో సమమైంది. ఈ దశలో సైనా చెలరేగి ఆడింది. అద్భుతమైన నెట్‌ ప్లేతో ప్రత్యర్థిని ఆత్మరక్షణలో పడేసింది. వరుసగా పాయింట్లు సాధించింది. 15-9తో ఆధిక్యంలోకి దూసుకెళ్లిన సైనా అక్కడి నుంచి ప్రత్యర్థికి ఒక్క పాయింటూ ఇవ్వకుండానే గేమ్‌ను, మ్యాచ్‌ను కైవసం చేసుకుంది. టైటిల్‌ నెగ్గినందుకు సైనాకు భారత బ్యాడ్మింటన్‌ సంఘం రూ.2 లక్షల నజరానా ప్రకటించింది. ముఖ్యమంత్రి వైఎస్‌ రాజశేఖర్‌రెడ్డి సైనాకు అభినందనలు తెలిపారు.